पोखरा २५ नाम्दुङ । नेपाल तामाङ घेदुङ पोखरा महानगर दाछोकला आयोजना ओसेम पोखरा नगरपालिकाला गेदिम सामाजिक फेल्गेबा महाशाखाला ह्रोरि तिरेला ताम्बा प्रशिक्षण गेताङ नाम्दुङ २५ कुनु पोखरा चिप्लेढुङ्गाला दि भिलेज रेष्टुरेन्टरि स्योल्बा मुला ।
गेताङ पोखरा महानगरपालिका वडानं १३ ला जनप्रतिनिधि सुचित तामाङला ग्रेनडोन्बोरि ताबा मुबा । गेताङरि थेसे तामाङ समुदायला मौलिक संस्कार थेन परम्परा सोना लासि थान्बारि चुह्राङ्बा गेताङसे महत्वपूर्ण भूमिका क्लाङ्सेला ताबासे निरन्तरताला लागि स्ह्युवा लाबाला छ्याम सरकारी निकायग्याम याङ्सेला ह्रोला लागि बाङ्पिन्सेला पाङ्जि ।
गेताङरि प्रशिक्षक ताम्बा गुरु नेपाल तामाङ घेदुङ कास्कीला ङ्हाच्छाला ग्यात्थोचोहा रामप्रसाद सम्देनसे तामाङ समुदायरि ताम्बाग्याम केबाहेन्से डोङ्बा दोनाला ल्होलो संस्कारजुगु स्योल्ना लाबारि आउदिन महत्वपूर्ण भूमिका मुबा ताम पाङ्जि । थेसे ब्रेल्साङ संस्कार स्योल्ना लाबारि ताम्बासे लातोबा क्योङ विधिजुगु प्रयोगात्मक स्ह्रुगरि प्रष्ट लाजि ।
गेताङरि नेपाल तामाङ घेदुङला ङ्हाच्छाला ग्यात्थोचोहो कुमबहादुर योन्जन थेन संघीय स्यानचोहो दिपक वाइबासे ज्याबाम्हान्बा सेमताम थान्बा मुबा । गेताङरि पोखरा महानगर न्हाङरि मुबा ल्होलो इकाईग्याम कास्की जोङरिन गिक्छारेम चुह्राङ्बा महत्वपूर्ण गेताङ आयोजना लाबा बिसिमाम आयोजकफिरि कृतज्ञता प्रकट लासि म्हिकादे उत्साहित तासि बोकिन्बा मुबा ।
गेन्दुनला गाउराइ गंगा ग्याबाला संचालन, स्यानचोहो मनकुमारी डुम्जन तामाङला डेन थेन चोहो अन्जना डुम्जन तामाङला चोहोदानरि गेताङ ताबा मुबा ।
(छिगकि दोनः दाछोक– समिति, फेल्गेबा– विकास, नाम्दुङ– चैत, स्योल्बा– सम्पन्न, स्ह्युवा– अनुरोध, ग्यात्थो– कार्यबहाक, स्ह्रुग– रुप, स्यानचोहो– उपाध्यक्ष)
तपाईको प्रतिक्रिया दिनुहोस