तामाङ चलचित्र छेन (संघ)से ‘सेमरि छोरङान पदक’ थेन डेन गेताङ स्हेङ्जि
याम्बु । २४ ड्वाफ्रे । तामाङ चलचित्र छेनसे ह्राङ्ला १७ छा स्हेङ्बाला दुइसाङरि ‘सेमरि छोरङान पदक’ थेन ल्होलो कलाकारकादेदा डेन लाबा मुला ।
चलचित्र छेनला चोहो दिपक लामाला चोहोदानरि ताबा गेताङरि ग्रेनडोन्बो चलचित्र विकास बोर्डला चोहो दिनेश डिसी मुबा । ग्रेनडोन्बो डिसीसे छ्योमे म्रासि गेताङ ठ्वाङ्सेन लाबा मुबा ।
गेताङला विशिष्ट डोन्बोरि तामाङ कलाकार छेनला चोहो विशाल काल्तान मुबा बिसाम विशेष डोन्बोरि आदिवासी जनजाति चलचित्र गेन्दुनछेनला गेचोहो भुइसल लामा मुबा ।
गेताङला स्यान्दो डोन्बोकादेरि चलचित्र ख्युरछ्या डाजाङला चोहो रोजन रखल, बागमती प्रदेश तामाङ चलचित्र छेनला चोहो दावा फिन्जो तामाङ, तामाङ स्योमि छेनला चोहो नेत्र तामाङ, ह्रोचोहो तीर्थमान बल मुबा ।
चुह्राङ्नोन लासि स्यान्दो डोन्बोकादेरि नमोबुद्ध खबरला संचालक जगतमान बल थेन ल्होलो गेन्दुनकादेला प्रतिनिधिजुगु मुबा ।
गेताङला संयोजक निायक तामाङला आन्सार गेताङरि ‘सेमरि छोरङान पदक’ याङ्बाजुगुरि तामाङ चलचित्रला लोकप्रिय नायक कुमार मोक्तान, चर्चित नायिका लता योन्जन, काइपा ओसेम ह्रोल्ज्याङ– विश्व दोङ मुबा ।
‘सेमरि छोरङान डेन’ ग्याम डेन याङ्बाजुगुरि नायक दावा फिन्जो तामाङ, वरिष्ठ स्याबा काठाक्पा दिनेश पाख्रिन, विरष्ठ स्योमि सुर्य मोक्तान, निर्माता ओसेम कलाकार प्रबल थिङ तामाङ, नायिका संगीता तितुङ, काइमो बबिता पाख्रिन, काइपा प्रतीक मोक्तान मुबा ।
गेताङ चलचित्र छेनला ग्रेनगाउराइ उत्तर लामासे लाबा मुबा ।
(छिगला अर्थः छेन– संघ, गेन्दुनछेन– महासंघ, ख्युरछ्या– संरक्षण, डाजाङ– मंच, स्योमि– पत्रकार, काठाक्पा– निर्देशक,)
तपाईको प्रतिक्रिया दिनुहोस