काभ्रेपलाञ्चोक १ बेल्बो । मोक्तान वंश अनुसन्धान समाज जोङ कार्य समिति काभ्रेपलाञ्चोकला ङ्योइसाङरि अन्तरक्रिया गेताङ ताबा मुला । गेताङ कामरेकुनु द अरनिको फेमेलि फुट क्याफे, बनेपारि ताबा मुबा । गेताङरि जोङ न्हाङला १३ वटा स्थानीय तहला खेन्पोकादेसे बोकिन्बा मुबा । मोक्तान वंश न्हाङरि मुबा लामा गुरु, बोम्बो, लाप्ताबा (लाबोन), डम्फुरे, ताम्बा थेन गान्बा गुङरि मोक्तानकादेला दोङराप, धर्म, रिमठिम, परम्परा, रीतिरिवाज, ग्युइ, ग्युइल, कौशल, कुल, फोलाफिरि अन्तरक्रिया ताबा हिन्ना ।

गेताङरि कार्यसमितिला चोहो बीरबहादुर मोक्तानसे ल्होलो ङ्योइबाला निसाल पिन्बान ग्रोइ सुझाव थेन मुतेबा नुररि दोसि गम्भीर तासि काठुइ लासेला पाङ्जि । गेताङरि काभ्रेरि मुबा मोक्तानकादेला गुङला फोला छ्योकु विधि फेबाफेबा म्राङ्बासे गिक्खे स्होबारि क्योङ्से बाङ लातोबा प्रस्ताव थान्मुबा ।

समाजला काभ्रेला चोहो बिरबहादुर मोक्तानला चोहोदानरि ताबा गेताङला डोन्बोकादेरि फुर्साङ मोक्तान, लिला मोक्तान, सलामसिं मोक्तान, ज्ञानध्वज मोक्तान, पदम मोक्तान, डिल्ली बहादुर मोक्तान, पासाङ मोक्तान, छ्योसाङ मोक्तान मुबा ।

चुह्राङ्नोन लासि गेताङरि जिल्ला कार्यसमितिला ह्रोचोहो बिकुलाल मोक्तान, गाउराइ मोतीलाल मोक्तान, छ्यागाउराइ सुकलाल मोक्तान, न्होरचोहो लक्ष्मी मोक्तान, ह्रोम्हि तेजबहादुर मोक्तान, म्हेन्दे मोक्तानतेन स्यान्दोकादेसे बोकिन्बा मुबा ।

गेताङरि समाजला जोङ ह्रोचोहो बिकुलाल मोक्तानसे डेन सेमताम थान्बा मुबा बिसाम गेताङ गाउराइ मोतीलाल मोक्तानसे स्याङ्बा मुबा ।

(छिगला अर्थः जोङ– जिल्ला, ग्युइल– कला, ङ्योइबा– प्रश्न, निसाल– उत्तर, ग्रोइ– सल्लाह, नुर– विषय, काठुइ– छलफल, छ्यागाउराइ– सहसचिव, ह्रोम्हि– सदस्य, सेमताम– मन्तव्य)