चुनाव हाजि । ग्यालाम क्यारमारला पोस्टर पम्लेटकादेसे म्हिकादेला सेम हालाहाम्बा छेङ्बान मुला । दोङ, बिजुलिला पोलला च्योदो थेन दिमला धुरिरि ख्यापथान्बा वाला, उर, तार, पिङ्गाइ राङबिराङ दाज्र्युकादेसे बेनादान वाम्बान मुला ।

पाल्देन गोर्गि बेरोजगार ब्योन हिन्ना । थेसे नाम्सारिन स्हु (दुःख) लासि लोप्पाडोबा लाजि । थेसे फाइला म्राप एसएलसि वाइबातेन मुरि फ्याङबा नामेह्राङ फ्याङ्सि ताङ्बा ग्लारि निम्याङ्ला बिबा म्हाङ म्राङ्मुबा । चुह्राङ्बा म्हाङ छ्योबादाह्राङ मुरालि दोसि सोझो आताबा चिम । सानाइह्राङ कोक्टेङ ताबा चिम । ओन्छ्यान ! थेसे था आयाङ्नि । था तासाइनोन सेमसे आङ्यान्नि बिले । तिनि नोन सेमसे आङ्यान्ना आङ्यान्नान न्होर ताजि ।

पाल्देनदा ह्रो मिङमासे फोनरि गे गि मुला पाङसि पार्टीला प्रचारप्रसार गेदिमरि ङ्योइजि । चुनाबरि रेबा गोबोनदेन ह्रुब ताना लाजि । चुनाबकुनु पार्टीला एजेन्ट चिबारि थेदा न्होर पिन्जि । ‘लिच्छा तिगाइ न्होर काप्सि पिन्ना, दात्ते चोदे बोर्सि निउ’ गोबोनसे मिङमा थेन थेदा वाम्जि । ताम थेसि पाल्देनला सेम बिसाम गाङ्ला दोङ ह्योङबाह्राङ ह्योङचिजि ।

‘चु न्होर बोर्सि नाम्साला तिगाइ छारिब्योनकादेदा जाजाकार ख्वागो । चु ताम हालाइदा आपाङ्गो’ मिङमासे कुल्जि । पाल्देनला नाम्सारि थे पार्टीला म्हि हालाइ आरेमुबा । पाल्देनदा बिसाम हाजिबाइ पार्टी आताङ्मुबा । ह्रोसे कुल्बासे आङ्यान्नाइ आताबा, ङ्यान्गे सेम आताङ्बा ताजि थेदा । काम्बा सेम थोसि दिमरि दोगाजि । हालाइदा तिगाइ आपाङ्ना कान चासि म्हेर्जि ।

पाल्देन मि च्युम्सि रोल म्हेरसाइ न्हाबेङ म्हेर्बा आरे । डेङ्ला घडिसे दुइ थाबान मुबा । घडिला घन्टासुइसे म्हुनला १२ वाइजिन्जि । सेमन्हाङरि लाबा लुङ्सुर स्याचिमुला । ‘दात्तेदोना ङाइ आज्याबा गे लाबा आरे । चु गे नोइ ओदे आज्याबा ह्राङ आछोर्नि । तिगदा ङादा ङ्हुबासे हाप आख्वाइनि ।’ पाल्देनसे ह्राङ्से ह्राङ्दान ङ्योइजि ।

एसएलसि पास लासि दिङ ङ्हि ताजिन्जि । जाँचरि चिट सुताइ ह्यो लाआहाम्बा पाल्देन ताम पाङ्बा सेसाइ ताइ ह्राङ्बा मुबा । ह्राङ्ला कमाइरि बिश्वास लाबा थेदा तिनि गे आलानान यारि तोङ्जा न्होर स्याप्जि ।

नागा ह्वाबा क्रासि स्ह्योला ह्याल ताबा सङ्केत पिन्जि । तोर छ्योङ मार छ्योङ लासि सेम ल्हाना दुमुबा । ‘न्हाङगार न्हाबेङ गि ङ्हि ताना तानान पाक्कान नाम्साबा बेनासेन था ताला ओसेम थे दुइरि खार लासि लि ओन्सि ब्रासे ? दोसि ओदे न्होरसे ङादा ल्हुइनाङ छ्योसेदा आरे । बरु पाले गि लासि चु न्होर दोसि पिन्तोजि’ पाल्देनसे अठोट लाजि ।

प्राकप्राक छाचिबा मि न्हाइबान मिङमादा फोन लाजि, ‘मिङमा ! ङालाम दुबाइ ग्याम्से भिसा हाजिम । चुनाब ङ्हाच्छान फ्याङतोसेदा ताजि । ङा नाम्सारि चिआम्याङ्बासे थे तिल्माला न्होर दोसि पुइगाला ह्या, हालदा पुइगाउ ?’

‘ङाइमि एदा तिगाइ खर्च लाबादा तगाइ पाङ्सि ताम डिक्ना लाबा हिन्ना । एदा आतोसाम खालाइदा पुइगाउ ले’, मिङमासे पाङ्जि । 
‘लु थेराङ हिन्साम ङाइ ङ्हे बाबा गाडीला ड्राइभरदा पुइगाला’, पाल्देन्से फोनरिन पाङ्जि ।

हदाइ हदाइ चिट्ठिला खाम म्हाइसि थेरि न्होर युसि टेपसे ख्वाराङराङ खिसि पुइजि । पल्देनला सेम ताङ्जि । ल्हिबा दोइ न्हाबाते छोर्जि । थे कुनु ङ्यासे ङोर डुइसि डुइसि म्हेर्जि ।

चुनाब हाजि । निजि । दिङ गि लिच्छा ह्रो गिदा पाल्देनसे बेनान ताम सेजि । ‘थुक्क एला बुद्धि ओसोन हाबा न्होर थानआतो ? कि ङान्दा पाङसाइ तासेदा ?’ चोराङ पाङ्सि थे ह्रो ङेजि ।