‘जितु खेप्पा याङ्जि ओम’

स्ह्यो पौने डु ङ्ह्यामा गौरीशंकरसे गौरीदा फोन लाजि । चु थेला फोन लाबा आदर्शतम दुइ हिन्ना । सुविधा पिन्बा ल्हानान दुइलिच्छा थेसे थाहा याङ्बा मुबा, स्ह्योला डु ङ्ह्यामा ङ्हाच्छा थेन म्हुनाला च्युइ ङ्ह्यामा लिच्छा फोन लासाम ल्हानान छुट याङ्ला बिसि ।

ङ्यासे बिबिसि नेपाली सेवा ङ्यान्बारि आम्याङ्जिमान थे छुपनिजिन्ना । तोङ्जा बैगुन याखारगि गुण बिमाह्राङ, थेचा चु याखारगि गुण मुला । स्ह्योरि योनान रेसि लि ख्रुबा, रेडियो थेन टिभी ह्राप्बा, चिया दाइमा ताङ ठाङठुङ ह्राप्सि स्यान्दोला निन्द्रा न्होङ्ना लामा थेदा ओन्मान कारबाही ताजिन्तोमुबा तासाइ थेसे तिनि दोना उन्मुक्ति याङ्बा मुला ।

ओइमा स्ह्योरि ४ ङ्ह्यामा वानग्याम जितु आपा म्हाजि बिसि नाम्सालान याखारगि आलेसे फेसबुकरि ग्रा युबा मुबा ओसेम थेसे तिल्मान स्ह्योरि गौरीदा फोन लासि ङ्योइबा मुबा । गौरीसे क्यार्से जासे गोबा गे ताबाकेन मुला, न्हाङ्गारतेमा थाहा ताला बिसि पाङ्बा मुबा ।

सोझो, सरल, सज्जन थेन परिश्रमि जितु आपा क्योलोलो गिक्खे (म्रिङ्सिबा) ताबा मुबा । ह्रेङ्बा दुइदोना नासि थेबिमा दिङरि ल्हानान च्याङ्बा थेला ङ्हिछा म्रिङनोन सिजिन्बा मुबा । जा जामेसे ज्याबान लाबा मुबा । थेतासि थेह्राङ्बा आज्याबा निर्णयमि तिगा लाला ले बिबा मोक्कोनदा छोर्बा मुबा ।

गौरीशंकरसे ओम शान्तिला ब्रम्हकुमारी परिणिता नानासे पाङ्बा याखारगि ताम सेमरि कोल्टो लासि थान्बा मुबा । याखारगि प्रशिक्षणरि थेसे बिमुबा– ‘मुतेबा म्हि याखारगि ज्योमोगाङ हिन्ना । थे माङग्यार कादे म्राङ्ला, न्हाङरि थे सोमछा ताला ।’

थेतासि म्हिला तिगा भर ? खेप्पा खानाङए विरक्त तासि ब्राजि व्हा ? उराठ छोर्सि खाजिबाइ आज्याबा निर्णय लाजि व्हा ? थेला पापी सेमसे चुह्राङ्बा नोन डान्बारि म्याङ्जि । चुह्राङ्बा आज्याबा सेमतेन गौरीशंकरला सेमरि कादे रेम खाबा हिन्ना । खाल्दा तिगा थाहा ?

ङ्हा, डु स्याङ निमा हेन्से गौरीसे फोन थिजि । ‘ङ्यान्गोले, न्हाङगार गाङ दिमरि छ्योकु मुला, मोक्कोन म्रिङ्कोला टपरी थुइबारि निमुबा, ङा नोन निजि । १ ङ्ह्यादे दोना स्यान्दो थेरिन मुबा, ङा दिमरि दोसि खाजि । भदा आलेसे दिगु आचादे निम्याङ बिसिमाम ग्यालाम पाङ्मुबा । ङाइ गाइजिन्जि बिसि आचाना खाजि ।’

ग्यालामरि कल्पना ह्रुप ताजि । थेसे आपाल मान बेजि व्हा मुला बिसि ङ्योइजि । ङाइ मुला बिजि । ओम हतार लासि दिमरि खाजि ओसेम मुइदा खोले छे पिन्जि । मुठीनाङ तासाइ चोकर आयुसाम खोलेसे सुङ्नोन आक्या क्यानाक्योरसे ।’

गौरीशंकरसे गुङरि थेनतासि बिजि, ‘जितु आपा, आस्याप्नि बिबा म्हाले ?’

गौरीशंकरदा मोबाइलला चार्ज जिन्ना व्हा बिबा स्हेर मुबा ।

गौरीशंकर बोमोहामाह्राङ लासि पाङ्जि, ‘बिबाकेन मुला ले ! खाइमाइ छ्योना पाङ्आपुङ ?’

खसी क्यानाक्योर जाकि खोले क्युइल्हाना तासाइ नोन चासिआपिन । पोलोवा दोङ्सि ज्याना लासि स्होपिन्तोमुला । स्होपिन्जि ।

ओसेम, रोहन साहुला जाच्याङ्बा उपेन्द्रसे खानाङग्याम मुग्याम जितु आपाला जागेन्चाला दिम पत्ता ल्हागाब लाजिम ओम प्रहरी चौकीग्याम गोजिम । खेप्पा बर्घाट व्हा बर्दियारिक्यार जागेन्चारिक्यार दोबा मुला रो । जागेन्चासे आपा नासिमाम ङाजा ज्योन्गाबा मुला बिबा रो ।’

थेलिच्छा मोबाइल टुँ टुँ लाजि ओम काइ आखानि । मोबाइलला चार्ज बेचिम ।

तिनि गौरीशंकर थेन गौरीला ताम छ्योना ताम्याङ्नि ।

(रापह्राङ्बा रापजुगु’ रापपोप ग्याम्से)

छिगला अर्थः वान– बगैंचा, स्याङ– घन्टी, स्हेर– पीर, नाबा– बिरामी,

दोःबा : यकिना अगाध