केबा रे तिनि एला–
जाम्बुलिङसे याङ्जि याखारगि अमुल्य रत्न
ओम ङाइ याङ्बा मुला छ्याम, एसे केवादा पिन्बा मुला दोखाङ थेन ग्याम ।
ए छ्याल्हाम्पा जेक्खे आहिन
ए हिन्ना ङाला आत्माला ह्रो
छिग बिमा नुप्बा गोबा
साँध थेन दुइबिमा क्यार ल्हेबा छ्याम ।
ङा ल्हानह्राङ्बा छिगकादे म्हाइचिला एला बयान लाबारि
तासाइ एमि सेमरि चिबा म्हि हिन्ना–
एदा गोबारि तामपाङ्बा जुरुरी आता
ङाला मौनतारि नोन एसे ङेबारि सेला ।
ए हिन्ना ङाला अधुरोपनला निसाल
अस्तित्वला अर्थ
ओम लिउला ह्यालला म्हाङ ।
ङाला चिवारि ज्योबा ताज हिन्ना ए
आस्तित्वला डेन, मस्तिष्कला गर्व ।
चोमो पात्र ए– जेक्खे तिङ्ला लागि आहिन
म्हाङ, संघर्ष थेन लिउला सुनिश्चित दानः नोन हिन्ना ।
केवाला ब्लाप्बासे दारे थुर्बारि आखाम ङादा
तिल्दाबिाम ए मुला–
लुङ्सुररि ओत ल्हागतिबा न्हान
स्हुरि खिल्बा भरोसाला आँचल ।
थाहा आरे स्यान्दोला चेगाइदा तिगा बिग्याम
खालाइसे चेगाइला परिभाषा ङ्योइजि बिसाम–
ङाइ एदा उन्ना–
याखारगि उदाहरण, याखारगि निसाल ओम याखारगि अनुभूति दोसिमाम ।
ए चेमो मुला, मेधावी मुला
ए न्हाङरि थे साहस मुला, थेसेलामा चुनाउती डाला ।
ङाइ गर्व लाला एदा–
तिल्दाबिसाम ए चेगाइ जेक्खे आहिन
केवाला प्रगति थेन सम्भावनाला छोन्बोलि हिन्ना ।
ताङ्बा थेन सफलतासे एला गोङ्मासे च्योगाइ
म्हाङकादे एसे थुरआतोगाइ, ङ्हाच्छान छ्योगाइ ।
सुख, शान्ति थेन समृद्धिसे सातान हापख्वाइगाइ ।
तिनि ए केबा रे
ङाला केवाला क्योङ्बिमा जेबा रे दोगाइ ।
ए के बा तिनिला रे–
ङाला लागि कोन्ज्योसोमसे ब्रिबा वरदान हिन्ना ।
एदा ङाइ चेगाइ लाचिसेला मुला–
छिगबिमा थारेङ, दुइबिमा ह्रेङ्बा थेन आत्माबिमा ङामरि
केबारेला ज्याबाम्हान्बा चेमो !
ए आरेना ङा अधुरो मुला
ओम एतेन छ्याम ङा क्योङ मुला ।
(छिगला अर्थः केबा– जन्म, जाम्बुलिङ– संसार, केवा– जीवन, छ्याल्हाम्पा– सहयात्री, छ्याम– साथ, नुप्बा– गहिराई, ल्हेबा– फैलिएको, निसाल– उत्तर, लिउ– भविष्य, चिवा– शीर, ज्योम्बा– सजिएको, चेमो– प्रिय, दानः– आधार, लुङ्सुर– आँधी, न्हान– चौतारा, च्योबा– चुम्नु, स्हु– दुःख, क्योङ– पूर्ण/सबै)
दोःबा : यकिना अगाध
तपाईको प्रतिक्रिया दिनुहोस