याम्बु ११ बेल्बो । नेपालला क्योङ ह्युलसंख्याला ३७ प्रतिशत प्रतिनिधित्व लाबा आदिवासी जनजातिला ङोसेबा, ह्युलठिमसे पिन्बा याङ्तामला कार्यान्वयनला छ्याम साझा मुद्दारि गिक्खे तासि समन्वयात्मक तोसोसे ङ्हाच्छा वाङ्बा ग्रान सम्बन्धित गेन्दुनकादेसे लाबा मुला ।

नेपाल आदिवासी जनजाति उत्थान प्रतिष्ठान थेन नेपाल आदिवासी जनजाति गेन्दुनछेनला अगुवाइरि नाबिङरे ताबा काठुइ गेताङरि चु ग्रान व्यक्त लाब हिन्ना ।

नेपाल आदिवासी उत्थान राष्ट्रिय प्रतिष्ठानला स्यानचोहो रेशम गुरुङसे ह्युलठिमसे पिन्बा संवैधानिक याङ्तामरि आदिवासी नेतृत्व गुङरि समन्वयात्मक सहजीकरण तोबा सेमताम थान्जि । आदिवासीला एकता आरेबा कारण कादे याङ्तामकादे दाते नोन याङ्बा ग्याम आदिवासीकादे बन्चित ताचिबा बिसि थेसे पाङ्जि ।

नेपाल आदिवासी जनजाति गेन्दुनछेनला चोहो गेल्जे लामा शेर्पासे आदिवासी गेदुङ गेन्दुनकादे गुङरि समन्वयात्मक लिरि गतिविधि ताबारि आखाम्मा परिणाम खाबारि गाह्रो ताबा बिसि पाङ्जि । आदिवासीला साझा मुद्दारि बेनान गेदुङ गेन्दुनकादे गिक्खे तासि ङ्हाच्छा वाङ्साम याङ्ताम देबान याङ्बारि खम्ला बिसि थेसे पाङ्जि ।

नेपाल आदिवासी जनजाति जामेकोला डाजाङ (निफ)ला ग्रेनगाउराइ शोभा सुनुवारसे आदिवासी गेदुङ गेन्दुन गुङरि एकता आरेबा कारण आदिवासीला मुद्दा कोेङ्बा लिरि रेन्बारि आखाम्बा पाङ्जि । आदिवासीला साझा मुद्दारि आदिवासी स्योमिसे आलोङ्ना कलम स्याङ्तोबा सेमताम थान्जि ।

नेपाल आदिवासी जनजाति स्योमि गेन्दुनछेन (फोनिज)ला चोहो लक्की चौधरीसे आदिवासी गेदुङ गेन्दुनसे गतिविधि लासाइ नोन समन्वय आछ्योबासे लामा कादे तामसोरकादे कभरेज ताबारि आखाम्बा पाङ्जि । आदिवासीला मुद्दारि मुलधारला मिडिया दाते नोन उदासिन मुबा बिसि थेसे फोनिजपाकादेतेन समन्वय थेन ह्रोगे लासाम आदिवासीला तामसोर कभरेजरि काक्ता आखासेला ग्रा थान्जि ।

आदिवासी जनजाति छारिब्योनला ग्रेनगाउराइ मिलन घिसिङसे आदिवासीला गेदुङ गेन्दुनला पदाधिकारी थेन ह्रोम्हिकादे गुङरि समन्वय आरेबा कारण गे लाबारि असहज ताबा पाङ्जि । आदिवासीला गेताङरि तामसोर यान्पाङ स्हेग्यामसे सम्प्रेषण लाबारि कुच्चिर लाबासे फोनिजसे थेरि ध्यान पिन्तोबा सुझाव पिन्जि ।

गेताङरि आदिवासीजन्य ल्होलो गेदुङ गेन्दुनला नेतृत्व, पदाधिकारी थेन प्रतिनिधिकादेसे बोकिन्बा मुबा ।

(छिगला अर्थः ग्रान– प्रतिबद्धा, बेल्बो– असार, ह्युलठिम– संविधान, याङ्ताम– अधिकार, गेन्दुनछेन– महासंघ, काठुइ– छलफल, स्यानचोहो– उपाध्यक्ष, सेमताम– मन्तव्य, गेदुङ– संघ, गेन्दुन– संस्था, देबाःन– सजिलै, डाजाङ– मञ्च, स्योमि– पत्रकार, फोनिजपा– फोनिजकर्मी, ह्रोगे– सहकार्य, काक्ता– समस्या, छारिब्योन– युवा, यान्पाङ– संचार, स्हेग्याम– माध्यम, कुच्चिर– कन्जुस)