विराटनगर २२ बेल्बो । नेपाल बीमा प्राधिकरणला ङ्योइसाङरि तिनि कोशी प्रदेशला मुख्यलोन्पो ओसेम मिन्त्रपरिषद्ला गेदिमला जोम्बाहल, बिराटनगररि कोशी प्रदेश सरकारतेन बीमा सम्बन्धी काठुइ ओसेम अन्तरक्रिया गेताङ ताजि ।

गेताङरि ग्रेनडोेन्बो कोशी प्रदेशला मुख्यलोन्पो हिक्मतकुमार कार्कीसे प्रदेश सरकारसे बीमाला दायरा ल्हेना लाबारि अध्ययन लाबारि याखारगि उच्चस्तरीय समिति स्होबा थेन प्रदेश बीमा नीति बाबा ग्रा पिन्जि ।

मुख्यलोन्पो कार्कीसे खाबा न्होरदिङरि  राहत बोलाबादा बिमा नागरिकता बीमाला दायरारि बाबा, च्याङ्ना छाबा कादेला बमिा लाबा थेन दिम बीमादा ङ्हाच्छा बोर्बारि प्राथमिकता पिन्सेला ग्रान पिन्जि ।

बीमा कम्पनीकादेसे दुइरिन बीमा दाबी भुक्तानी आलातेदोना बीमाफिला विश्वास आल्हे बिबान मुख्यलोन्पो कार्कीसे दुइरिन दाबी भुक्तानी आपिन्बा कम्पनीकादेदा प्राधिकरणसे कारबाही लातोबा ताम थान्जि ।

नेपाल बीमा प्राधिकरणला चोहो शरद ओझासे बीमा पेठिम थेन नियमावलीरि मुबा डिछ्या आन्सार बीमादा ङ्हाच्छा बोर्बारि प्रदेश सरकारसे उन्बा अग्रसरताफिरि आभार फुल्जि ।

गेताङरि नेपाल बीमा प्राधिकरणला काठाक्पा निर्मल अधिकारीसे बीमाला महत्व, बीमा बजारला दातेला दुइ थेन बमिा थुमला फेल्गेबा ओसेम ल्हेना लाबारि प्रदेश सरकार भुमिकाफिरि सेमताम थान्मुबा ।

गेताङरि बोकिन्बाकादेसे नेपाल बीमा प्राधिकरणसे मुतेबा प्रदेशला लागि साझा बीमा नीतिला मस्यौदा स्होतोबा, बीमाला फेल्गेबा ओसेम पहुँच ल्हेना लाबारि गेदुङ थेन प्रदेश गुङरि ह्रोगे तातोबा, ह्रि लाङ्बोग्याम प्रभावित थुमला लागि लाङ्बो बीमा बातोबा, बीमा दाबी भुक्तानीरि गाइना लाला आदेबा ह्राङ्बा गुनासो थान्बा मुबा ।

गेताङरि कोशी प्रदेशला लोन्पो, प्रदेश योजना आयोगला स्यानचोहो, प्रदेश मन्त्रालयला गाउराइ थेन पदाधिकारीकादे थेन नेपाल बीमा प्राधिकरण केन्द्रीय गेदिम ओसेम प्रदेश गेदिमला कर्मचारीकादेसे बोकिन्बा मुबा ।

गेताङला संचालन नेपाल बीमा प्राधिकरण, कोशी प्रदेश गेदिमला प्रमुख विनोद पोखरेलसे लाबा मुबा ।

(छिगला अर्थः गेदिम– कार्यालय, जोम्बाहल– सभाहल, काठुइ– छलफल, न्होरदिङ– आर्थिक वर्ष, छाबा– आय, ग्रान– प्रतिबद्धता, पेठिम– ऐन, डिछ्या– व्यवस्था, काठाक्पा– निर्देशक, फेल्गेबा– विकास, सेमताम– मन्तव्य, ल्हेना– विस्तार, गुदुङ– संघ, स्यानचोहो– उपाध्यक्ष)