याम्बु २७ बेल्बो । संघीय राजधानीला प्रमुख पर्यटकीय दोखाङ ठमेलरि ‘पर्यटन ग्रा केन्द्र’ स्हेङ्बा मुला ।
बागमती प्रदेशला रिमठिम ओसेम पर्यटन मन्त्रालयसे याम्बु महानगरपालिका २६ ला ह्रो थेन ठमेल पर्यटन फेल्गेबा परिष्द्ला ह्रोगेरि पर्यटन ग्रा केन्द्र स्हेङ्बा हिन्ना ।
थे केन्द्रला सुङरे बागमती प्रदेशला रिमठिम ओसेम पर्यटनलोन्पो बिमल ठकुरीसे ठ्वाङ्सेन लासि तिजि । गेताङरि लोन्पो ठकुरीसे ग्रा केन्द्रसे ठमेल जेक्खे आताना नेपालान पर्यटन फेल्गेबारि ह्रो तासेला विश्वास थान्जि ।
थेसे बागमती प्रदेशला चितवन लिच्छा ठमेलरि पर्यटन ग्रा केन्द्र स्हेङ्बा ग्रा पिन्बाकेन थे केन्द्र ग्याम पर्यटकसे नेपालला पर्यटकीय गतिविधिला बारेरि थाहा याङ्सेला पाङ्जि । ठमेलरि सार्वजनिक ट्वाइलेट सुताइ स्हेङ्सेला थेसे पाङ्जि ।
काठमाडौं महानगरपालिका २६ ला वडाचोहो ख्यामराज तिवारीसे नेपाल कोर्बारि खाबा फिरग्याप ह्युलला पर्यटक गुङ्ला ८० प्रतिशत पर्यटक ठमेल कोर्बारि खाबा ताबासे थेन्दा ग्रा केन्द्र ग्याम ह्रोतासेला विश्वास थान्जि ।
बागमती प्रदेश रिमठिम ओसेम पर्यटन मन्त्रालयला गाउराइ दीपेन्द्र सुवेदीसे प्रदेश सरकारसे प्रदेश न्हाङ्ला मुतेबा जोङला पर्यटकीय दोखाङदा ह्रुप्सि ‘ट्रभल बुक’ तेगे लाबा ग्रा पिन्जि । थेसे पर्यटन ग्रा केन्द्रदा प्रविधितेन थुइसि ङ्हाच्छा बोर्बारि प्रदेश सरकारला ल्हागतिचिबा उल्लेख लाजि ।
पर्यटन गेदिम याम्बुला प्रमुख भक्तबहादुर भण्डारी, ठमेल पर्यटन फेल्गेबा परिषद्ला चोहो ध्रुव अधिकारी, ङ्हाच्छालाचोहो डा. रामशरण थपलिया, ट्रेकिङ एजेन्सिज एसोसिएन अफ नेपाल (टान)ला चोहो सागर पाण्डेतेन स्यान्दोकादेसे पर्यटन ग्रा केन्द्र स्हेङ्बातेन पर्यटकदा देबाः तासेला थेन पर्यटन ल्हेछ्यारि ह्रोतासेला पाङ्जि ।
सुङरेहेन्से तिबा थे ग्रा केन्द्रग्याम पर्यटकदा नेपालला पदमार्ग, यातायात, होटल, स्थानीय ग्युइल रिमठिमला बारेरि जानकारी पिन्सेला बागमती प्रदेश पर्यटन मन्त्रालयला पर्यटन महाशाखा प्रमुख पवनकुमार पोखरेलसे जानकारी पिन्जि ।
ठमेल पर्यटन विकास परिषद्ला स्यानचोहो सहदेव (बिमल) धमलासे स्यानह्युल स्तररि नेपालला ङोसेबा ङोसेना लाबा ठमेलदा डिछ्याना लाबारि परिषद्से गेलाचिबा पाङ्जि ।
ठमेल थुमदा चलायमान स्होबारि खाबा रेरि प्रदेश सरकारला ह्रोतासि चिसेला थेसे विश्वास पिन्जि ।
(छिगला अर्थः ग्रा– सूचना, फेल्गेबा– विकास, देबाः– सहज÷सजिलो, ल्हेछ्या– प्रबर्धन/संबर्धन, सुङरे– शुक्रबार, ग्युइल– कला, स्यानचोहो– उपाध्यक्ष, स्यानह्युल– अन्र्राट्रिय, ङोसेबा– पहिचान, डिछ्याना– व्यवस्थित)
तपाईको प्रतिक्रिया दिनुहोस