हेटौंडा १९ गोने । बागमती प्रदेश ग्रेन्पो दीपकप्रसाद देवकोटासे गोरब्लि विधेयक प्रमाणीकरण लाबा मुला । लानिरे प्रदेश ग्रेन्पो देवकोटासे प्रदेशग्याम पारित ताबा गोरब्लि विधेयकजुगुदा प्रमाणीकरण लाबा हिन्ना ।

प्रदेश ग्रेन्पो देवकोटासे प्रदेश औद्योगिक छोङ्नाम पेठिम २०७५ दा डिक्लाबारि स्होबा विधेयक, प्रादेशिक छोङ थेन छोङ्नाम सम्बन्धी पेठिम, २०७५ दा डिक्लाबारि स्होबा विधेयक, मदन भण्डारी ल्हुइथाङ विज्ञान प्रतिष्ठान पेठिम, २०७६दा डिक्लाबारि स्होबा विधेयक थेन प्रदेश सानाम फेल्गेबा सम्बन्धरि डिछ्या लाबारि स्होबा विधेयक प्रमाणीकरण लाबा हिन्ना ।

प्रदेश ग्रेन्पो देवकोटासे छोङ्पा विधेयक ङ्ही थेन ल्हुइथाङ विज्ञान प्रतिष्ठानला विधेयकदा नेपालला ह्युलठिमला धारा २०१ ला उपधारा २ आन्सार प्रमाणीकरण लाबा हिन्ना बिसाम प्रदेश सानाम फेल्गेबा सम्बन्धी विधेयक ह्युलठिमला धारा २०१ ला उपधारा ४ प्रमाणीकरण लाबा हिन्ना ।

थे विधेयकजुगु प्रदेशसभाला चिसाङग्याम पारित तासि प्रमाणीकरणला लागि प्रदेश ग्रेन्पो ङोन्छाङ पेस लाबा मुबा ।

(छिगदोनः ग्रेन्पो– प्रमुख, लानिरे– सोमबार, छोङ्नाम– व्यवसाय, पेठिम– ऐन, डिक्लाबा– संशोधन, छोङ– व्यापार, ल्हुइथाङ– स्वास्थ्य, सानाम– कृषि, फेल्गेबा– विकास, डिछ्या– व्यवस्था, छोङ्पा– व्यवसायिक, ह्युलठिम– संविधान, चिसाङ– वैठक)