याम्बु २७ गोने । नेपाल आदिवासी जनजाति स्योमि गेन्दुनछेन (फोनिज)से ह्राङ्ला २६छा स्हेङ्बा दिङसाङ ग्रेनलिरि दाङ्बा मुला । यान्पाङ थेन ग्राप्रविधिब्लोन पृथ्वीसुब्बा गुरुङसे गेताङला ठ्वाङसेन लामुबा ।

ब्लोन गुरुङसे स्योमिला गे देन्बाला उजागर लाबा ताबासे समाज, ह्युल थेन ह्युल्बाला तिलोरि कलम चलप लाबारि आग्रह लाजि । फोनिजला गेताङला सफलताला ज्याबाम्हान्बा पिन्बान डेन ओसेम पुरस्कृत मुतेबादा बधाइ फुल्जि ।

छारिब्योन ओसेम क्लाङ्छ्योङब्लोन तेजुलाल चौधरीसे कानुनी ग्याल्सारि खालाइला काइ डुल्बारि आडिक्बा पाङ्जि । आदिवासी जनजाति स्योमिजुगु ह्युलला काइ ताबा बिबान थेसे स्योमिदा अंकुश ल्हागाब लाला आदेबा धारणा थान्जि ।

ङ्हाच्छाला ब्लोन हितबहादुर तामाङसे स्योमिदा पाङ्बा थेन ब्रिबा याङ्ताम सातान सुनिश्चित तातोबा पाङ्जि । आदिवासीसे ह्राङ्ला भुमिका कोङह्रावा लाबारि आखाम्बा दुइरि स्योमिसे थेरि सचेतनाला गे लातोबा थेसे सुझाव पिन्जि ।

ङ्हाच्छाला ब्लोन ओसेम एमाले नेता भगवती चौधरीसे देन्बातथ्यदा ध्यान पिन्सि कलम चलप लातोबा पाङ्जि । ह्युल थेन ह्युल्बाला ग्यालाम ओन्बारि जिम्मेवारी स्योमिसे लाचिबा थेसे पाङ्जि ।

ङच्छाला ब्लोन ओसेम नेपाली कांग्रेसला सांसद कान्छाराम तामाङसे बागमती प्रदेशरि छ्योआछ्यो ३५ प्रतिशत तामाङ समुदायला बाप्सा मुबासे थेनोन आन्सार याङ्ताम सुनिश्चित तातोबा पाङ्जि ।

फोनिजला स्हेङखेन चोहो चन्द्रसिंह कुलुङसे ग्याल्सारि समावेशीता बातोला बिबा दोन्ताला छ्याम फोनिज स्हेङ्बा पाङ्जि ।

नेपाल आदिवासी जनजाति गेन्दुनछेनला चोहो गेल्जे लामा शेर्पासे स्योमिसे खेडोबा, अनुसन्धान लासि जेक्खे तामसोरि तेःतोबा पाङ्जि ।

नेपाल स्योमि गेन्दुनछेन निर्मला शर्मासे गेन्दुनछेनला स्हेङ्खेन चोहोला नुररि काठुइ ङ्हाच्छा बोर्चिबा बिबान चुफिरि ह्राङ्नि सकारात्मक मुबा पाङ्जि । चु नुररि फोनिजसे छिङ्चिबा उल्लेख लाबान स्योमि गेन्दुनछेन नोन चु नुररि सचेत मुबा सेमताम थान्जि ।

फोनिजला संघीय चोहो लक्की चौधरीला चोहोदानरि ताबा गेताङरि फोनिजला ग्रोइपा डण्ड गुरुङ, ङ्हाच्छालाचोहो गजुरधन राई, ग्याल्साङ आदिवासी जनजाति जामेकोला गेन्दुनछेनला चोहो निमी शेर्पा, नेपाल प्रेस युनियनला गाउराइ लाल मोक्तान, प्रेस न्हान नेपालला ग्रेनगाउराइ हिरामान लामा, प्रेस सेन्टरला ग्रेनचोहो मनोज घर्ती मगर, फोनिजला वरिष्ठ स्यानाचोहो सरु राना मगर, एआइपीपीला प्रतिनिधि जगत बराम, डिजिएम गेन्दुनला साधना लिम्बू, फोनिज बागमती प्रदेशला चोहो युवराज श्रेष्ठतेन स्यान्दोकादेसे ह्राङ्ह्राङ्ला सेमताम थान्बा मुबा ।

१२ स्योमिदा डेन थेन पुरस्कार :

फोनिजसे स्हेङ्बा दिङसाङला दुइसाङरि मिरे आमाग्योइ स्योस्योला छ्याम १२ म्हे स्योमिदा डेन थेन पुरस्कार पिन्जि । फोनिज स्योनाम डेन २०८२ ग्याम गजुरधन राई, अमरध्वज लामा थेन राजवंशी ग्योइला लासोमला तिरेम स्योस्यो कोचिलादा डेन लाजि । डेनला राशी नगद तोङजा ३१ थेन डेनस्यो मुबा ।

फोनिज स्योनाम पुरस्कारग्याम स्योमि सविन प्रियसन, मुनेस रायो मगर, बन्दना दनुवार डेन ताजि । नगद २५ तोङ्जा थेन प्रमाणस्योसे थेन्दा डेन लाबा मुबा ।

अमेरिकारि चिसि स्योनाम लाचिबा स्योमि मच्छे गुरुङदा फोनिज प्रवास अवार्ड २०८२ से डेन लाबा मुबा ।

फोनिज मलेसिया पुरस्कारग्याम सपना थामी थेन ज्ञानेन्द्र तामाङ पुरस्कृत ताजि । नगद १० तोङ्जाला छ्याम डेनस्योसे थेनि पुरस्कृत ताजि ।

फोनिज युके स्योनाम पुरस्कार २०८२ ग्याम आश गुरुङ थेन डोल्मा शेर्पा, फोनिज बागमती प्रदेश दाछोकग्याम स्हेङ्बा फोनिज पुरस्कार २०८२ ग्याम पूर्णबहादुर मगर पुरस्कृत ताजि ।

ब्लोनङ्ही गुरुङ थेन चौधरीसे डेन थेन पुरस्कृत स्योमि डेन थेन पुरस्कार बोलाबा मुबा ।

गेताङरि थारु, तामाङ, मंगर, बाइ थेन शेर्पा समुदायला स्याबा उन्बा मुबा ।

(छिगदोनः दिङसाङ– वार्षिक, काप्तोन– उत्सव, स्योमि– पत्रकार, गेन्दुनछेन– महासंघ, यान्पाङ– संचार, ग्रा– सूचना, देन्बा– सत्य, तिलो– पक्ष, डेन– सम्मान, क्लाङ्छ्योङ– खेलकुद, ब्लोन– मन्त्री, ग्याल्सा– राज्य, दुल्बा– दबाउनु, याङ्ताम– अधिकार, कोङह्रावा– सुरक्षा, दोन्ता– उद्देश्य, नुर– विषय, काठुइ– छलफल, ग्रोइपा– सल्लाहकार, ग्याल्साङ– राष्ट्रिय, स्यानचोहो– उपाध्यक्ष, गेन्दुन– संस्था, म्हे– जना, स्योनाम– पत्रकारिता)