तानाशाहसे खानाङए ग्याम न्यायला
जहाँगीरी स्याङफिरि थाहा याङ्जि
ओम थेसे तय लाजि कि दारेहेन्से थे नोन जहाँगीरह्राङ न्याय लासेला मुला ।
थेलिच्छा थेसे मुख्य न्यायाधीशदा
छाडा सेम्चेनजुगु, आइराक चुङ्बाजुगु, वेश्यालयजुगु
ओम ट्राफिक नियम उल्लघंनतेन ब्रेल्चिबा मुद्दाजुगु
थुम्ना लाबा जिम्मा पिन्जि ओम ह्राङ्चा
ङोन्छाङ स्ह्रुगरि म्हिजुगुदा न्याय पिन्बारि चुजि ।
थेसे ह्राङ्ला दरबारला म्रापरि
जाम्बुलिङलान मोक्कोन बिमा ग्रेन स्याङ च्योजि
ओम म्हिजुगुदा न्यायला चु छार डिछ्यालाफिरि
ग्रादाङ पिन्जि ।
तानाशाहसे थे स्याङ्ला छोदा
ह्राङ्ला म्हेर्बा कोठा, तिसाला खुमरि
याखारगि दारि खिपुङ्जि ।
खाइमा थेदा समे तामुबा
थेसे ह्राङ्सेन स्याङ ह्राप्मुबा
ओम न्याय लाबाला लागि म्हुन–रे
स्ह्यो–ङ्यासे, खात्दामान दुइ नोन
बालकोनीरि थोन्मुबा ।
तानाशाह ह्राङ्नोन न्यायाधीशला कुर्सीरि चिमुबा
ओम मुद्दा, मुद्दाकर्ता थेन प्रतिवादी ह्राङ्सेन तय लामुबा
ओम बेजोडसे गि लिच्छा स्यान्दो
मुद्दा थुम्ना लाबान न्याय लासिकेन निमुबा ।
तानाशाहसे चोत्ते ल्हाना न्याय लाजि,
चोत्ते ल्हाना न्याय लाजि कि सडकजुगु सुनसान ताजि,
बस्तीजुगु वाफ्युर ताजि,
ह्रि–ल्हागाङ उजाड ताजि
ओम स्योङजुगु हार्सिकेन निजि ।
म्हिजुगुसे चुह्राङ्लासि न्यायफिरि
चु देन्बा थाहा याङ्जि कि दारे
न्याय बिबा तानाशाहला स्याङ हिन्ना ।
दोःबा : यकिना अगाध
(जहाँगीर मुगल साम्राज्यला ब्लिछा ग्याल्बो (सम्राट) मुबा । थेला क्योङ मिन नुरुद्दीन मोहम्मद जहाँगीर मुबा । थेसे सन् १६०५ हेन्से १६२७ दोना शासन लाबा मुबा । थे महान् मुगल सम्राट अकबरला कोला मुबा ।
जहाँगीर विशेष लासि ‘न्यायप्रिय शासक’ स्ह्रुगरि चर्चित मुला । दोङरापरि ‘जहाँगीरी स्याङ’ बिबा याखारगि प्रसिद्ध प्रसंग याङ्मुला । बिमुला, थेसे ह्राङ्ला दरबार माङ्ग्यार याखारगि ग्रेन स्यान च्योबा मुबा, खालाइ पीडित म्हिसे थे स्याङ ह्राप्सि सोझोन ग्याल्बो ङोन्छाङ न्याय ह्रिबारि खाम्गाइ ।
चुनोन ‘जहाँगीरी घण्टा’ला प्रतीकदा व्हाइखारि क्यालो स्ह्रुगरि प्रयोग लाबा मुला । व्हाइखाला तानाशाहसे नोन ह्राङ्दा न्यायचेमो उन्बारि ओस्बान स्याङ च्योला, तासाइ लिच्छारि थेला ‘न्याय’ दुल्बा थेन हिंसारि पोला ।
(छिगकि दोनः स्याङ– घन्टा, सेम्चेन– पशु, ब्रेल्चिबा– सम्बन्धी, स्ह्रुग– रुप, ङोन्छाङ– प्रत्यक्ष/समक्ष, डिछ्या– व्यवस्था, ग्रादाङ– जानकारी, ल्हागाङ– पहाड, देन्बा– सत्य, न्यायचेमो– न्यायप्रेमी, दुल्बा– दमन)
तपाईको प्रतिक्रिया दिनुहोस