ओन्मा ङ्हाच्छा जाम्बुलिङरि कोल्मे आरेमुबा । गिक्छारेम बुद्धसे ह्राङ्ला चमत्कारपूर्ण वाङग्याम बोधिसत्वला स्ह्रुगरि याखारगि माकारला सृष्टि लास्ह्युजि ।
थे माकार गाङ्ला उरि ध्यान लासि चिमुबा । बुद्धदा चु ग्रादाङ ताजि कि माकार स्हिल्बाला फ्रुम जेक्खे चासिमाम सोमुला । थेलिच्छा बुद्धसे डासिन डोल्मादा माकारला सोबा दाःन तिगा मुबाचिम बिबा गोबारि पुइजि । डासिन डोल्मासे स्हिल्बाला फ्रुमजुगुरि ङ्ह्योइबा स्हे ब्रामा ठाम्जि । ध्यानरि चिबा माकारदा स्हिल्बाला फ्रुमरि खालाइसे ब्रामा दोङ्पिन्बा थाहा आतानि ।
माकारसे ब्रामा दोङ्बा स्हिल्बाला फ्रुमजुगु ग्लुकग्लुक थुङ्जि । ङ्हाच्छारिक्यार थेसे ताङ नाङ जेक्खे स्हिल्बा थुङ्मुबा । तिनिला स्हिल्बाला फ्रुमजुगु ङ्ह्योइबा स्हे मुबासे गोर ङ्ही सोम ताङ स्हिल्बा थुङ्बारि चुजि । थेलिच्छा थे ङ्ह्योइजि । थेला प्रभावसे थेसे व्हाइ कोबारि चुजि । ङ्ह्योइबा माकारदा डासिन डोल्मासे चेगाइ लाबारि म्होइजेन लाजि । तासाइ माकारसे ‘बुद्धला अनुमति आरेबासे थेह्राङ लाबारि आखाम’ बिसिमाम डोल्मादा पाङ्जि ।
माकारला चु ताम थोसि डोल्मो बुद्धचा दोजि । बुद्धग्याम माकारदा कुल्जि कि ‘दारे कोल्मे जातिला केबा दुइ खाजिन्बा मुला । थेतासि एसे बुजु स्होसिमाम ल्हासिङ देग्लेइदा फुल्गो । गोर डु तोसोला जीवात्माजुगु ला, म्हि, राक्षस, प्रेद, सेम्चेन, ड्ह्याम्बु फुल्गो । उपयुक्त दुइ ताजि कि एनि सहवास लाउ । थेग्याम म्हि जातिला केला ।’
चुलिच्छा साप्रा थेन युङ्बा, क्युइ थेन तारङा, चराचुरुङ्गी थेन दोङ, ल्हागाङ थेन माकार गुङला ब्रेल्बा नुप्बा ताजि । जाम्बुलिङरि म्हि थेन ह्राङ्ज्युङ जगत सञ्चालन तानिजि ।
चुनोन घटनाला दाःनरि साजाम्बुलिङरि म्हि थेन ह्राङ्ज्युङ ठुङ्बा हिन्ना बिबा तामाङजुगु विश्वास लामुला ।
(छिगकि दोनः कोल्मे– मानव, वाङ– शक्ति, स्ह्रुग– रुप, ग्रादाङ– जानकारी, स्हिल्बा– शीत, फ्रुम– थोपा, डासिन डोल्मा– बोधिसत्व तारा, दाःन– आधार, ल्हासिङ देग्लेइदा– आठ देवता र आत्माको समूह, ल्हागाङ– पहाड, ब्रेल्बा– सम्बन्ध, ह्राङ्ज्युङ– प्रकृति)
दोःबा : यकिना अगाध
तपाईको प्रतिक्रिया दिनुहोस