गौरन टोलरि बास चिसि स्ह्योरिन दोजि– रानीचुरी न्हान । चुग्याम कमला स्योङ थेन चुरेला पिङ्गाइ ह्रि ङामलान भिमान बजार प्रस्ट म्राङ्ला । चुनोन बजारग्याम वीपी राजमार्ग लोरिक्यार थेन मदन भण्डारी राजमार्ग स्याररिक्यार वाङ्ला ।
भिमान बजारला मेरि मुबा– भिमल पाटी (भिममान) । चुरि ब्लाप्बा न्हासि बटुवा कमला स्योङ थासि क्रेमुबा रानीचुरीरिक्यार । सरकारी टोलग्याम क्रेसि घन्टा गि ब्रामाहेन्से दोला– चु न्हान । चु ङामरिन मुबा– माधव शम्शेरला दरबार ।
राणादुइला धनकुटा गौंडाला बडाहाकिम हिन्ना– माधव शम्शेर । थेसेन वि.सं.१९९० दिङरिक्यार सिन्धुलीरि दरबार स्होबा मुबा । ओम, ९८ दिङरिक्यार ग्याम चिबा चुबा मुबा । थेनोन दुइ चु डहु पिपल थेसेन सुबा हिन्ना बिमुला ।
चु ग्यालाम– ल्हानान खेःबा हिन्ना । भिमल आलेसे स्हेङ्बा सुली भञ्ज्याङला शिवालय, सत्तल तासिमाम वितिजोर तासिकेन धापचौकी थोन्ना– चु काङ्ग्याम– पैदल मार्ग । सुलीभञ्ज्याङ थोन्सि सुनकोसीला गुनोन गु रोशीस्योङ तासिकेन याम्बु थोन्बा चल्तिला ग्याम मुबा । महेन्द्र राजमार्ग स्होबा ङ्हाच्छा दोना काङ्ग्याम आउदिन चालु मुबा ।
धापचौकीग्याम तिनपाटन तासि रानीचुरीला खेःबा काङग्याम म्हासितिसि जिन्बा मुला । ङाला सेम मुबा– थे ओन्माला काङ्ग्याम दाङ्बारि । तासाइ, ङ्हाच्छारिक्यार कच्ची सडक मुबा । चुदान दाङ्सि ङ्हाच्छा वाङ्जि ।
(छिगकि दोनः न्हान– चौतारा, खेःबा– पुरानो, काङ्ग्याम– पैदल मार्ग, दाङ्बा – पछ्याएको)
दोःबा : यकिना अगाध
तपाईको प्रतिक्रिया दिनुहोस