सिन्धुपाल्चोक । मेलम्ची नगरपालिकाला नगर ग्रेन्पो आइतमान तामाङसे नगरसे सञ्चालन लाबा योजना ओसेम नीतिजुगु तोबा आन्सार डिक्लाबारि खाम्सेला पाङ्बा मुला । न्होरकि दिङ २०८१/०८२ ला दिङ्कि समिक्षा गेताङरि ताम थान्बान थेसे योजनाला गेजुगु प्रभावकारी, गुणस्तरीय थेन दुइरिन जिन्ना लाबारि मोक्कोन सरोकारवालाजुगुदा म्होइजेन लाजि । थेसे समृद्ध नगर स्हेङ्बा अभियानरि मोक्कोन गिक्खे तासि ह्रो लातोबा पाङ्जि ।

गेताङरि स्यानग्रेन्पो उमा प्रधानसे नगरला योजनाला अनुगमन तिलोदा डिछ्याना तोसोसे ङ्हाच्छा बोर्बा प्रतिबद्धता व्यक्त लाजि । थेसे नगरसे सञ्चालन लाबा गेताङजुगु टुबा थेन उपलब्धिमूलक तातोबारि बाङ पिन्जि ।

गेताङरि ग्रेन्पो प्रशासकीय अधिकृत निमेष मिश्रसे ङ्हाच्छाला न्होरकि दिङरि नगरसे सम्पादन लाबा गे, उपलब्धि, काक्ता थेन समाधानला नुररि विस्तृत प्रस्तुतीकरण लाजि ।

गेताङरि वडा नं. २ ला वडाचोहो नगेन्द्रप्रसाद खतिवडासे वडास्तरग्याम लाबा गेला अनुभव किन्बापिन्बा लाबाला छ्याम थिग्युन लातोबा तिलाला नुररि सुझाव पिन्जि । गेताङरि नगर थुमन्हाङरि क्रियाशील गैरसरकारी गेन्दुनजुगुसे नोन ह्राङ्ह्राङ्ला परियोजनाला गे प्रगति ओसेम उपलब्धिजुगुला प्रस्तुतीकरण लाबा मुबा ।

गेताङसे नगरपालिकाला नीति, योजना थेन कार्यान्वयन प्रक्रियादा पारदर्शी थेन प्रभावकारी स्होबा दोन्ता किन्बा उन्पाङ्बा मुला ।

(छिगकि दोनः दिङ्कि– बार्षिक, डिक्लाबा– संशोधन, ग्रेन्पो– प्रमुख, न्होरिकि– आर्थिक, स्यानग्रेन्पो– उपप्रमुख, तिलो– पक्ष, डिछ्याना– व्यवस्थित, तोसो– ढंग, टुबा– दिगो, काक्ता– समस्या, छिम्बा– समाधान, नुर– विषय, थिग्युन– सुधार, गेन्दुन– संस्था, दोन्ता– उद्देश्य, उन्पाङ्बा– जनाइएको)