याम्बु । तामा स्योमि संघ याम्बु जोङ शाखा थेन विश्वशान्ति चिरण–मिलन क्याम्पस गुङरि छात्रवृत्ति पिन्बा सम्बन्धि सम्झौता ताबा मुला । बुधबार बाँसबारीला क्याम्पसरि ताबा गेताङरि स्योनाम नुररि डोबा तामाङ लोप्बोनदा छात्रवृत्ति पिन्बा सम्झौता ताबा हिन्ना ।

सम्झौतास्योरि क्याम्पस प्रमुख नेत्रप्रसाद न्यौपाने थेन तामाङ स्योमि शाखा ग्याम हिरोज लोप्चनसे हस्ताक्षर लाबा मुला ।

सम्झौता आन्सार स्नातक तहरि स्योनाम नुर डोबा तामाङ समुदायला लोप्बोनसे छात्रवृत्ति याङ्सेला मुला । थेला लागि तामाङ स्योमि संघ जोङ शाखा याम्बुसे सिफारिस लातोसेला मुला । दिङ ब्लिदोना स्नातक तहरि स्योनाम नुर (विषय) डोबा लोप्बोनसे छात्रवृत्ति याङ्सेला सम्झौतारि उल्लेख मुला ।

सम्झौतास्योरि हस्ताक्षर लाबान क्याम्पस प्रमुख न्यौपानेसे स्योमिरि ह्युलला सत्तादा पोबारि खाम्बा बाङ ताबा मुला बिबान संघतेन सम्झौता लाम्याङ्मा गौरव छोर्बा बिसि पाङ्जि । ‘कलमरि बाङ ताला । थे बाङ स्योमिग्याम प्रयोग ताला । स्योमिरि ह्युलला सत्तादा पोबा बाङ ताला’, थेसे पाङ्जि, ‘थेह्राङ्बा बाङ मुबा स्योमि केना लाबारि सम्झौता लामा गौरव छोर्बा मुला । स्यान्दोदा नोन चुरि छात्रवृत्तिमि पिन्बा मुला, तासाइ नोन विशेष लासि तामाङ समुदायला लोप्बोनदा छात्रवृत्ति पिन्बा घोषणा लाला ।’

क्याम्पस चक्रपथग्याम ङामरिन तासाइ नोन माजिङ्बा (कोलाहल) आरेबा, शान्त वातावरण मुबा थेन गुणस्तरीय अध्यापन लाबासे ल्हानान लोप्बोनला दाम्बारि परतिचिबा न्यौपानेला ताम मुबा । थेला आन्सार क्याम्पससे क्युएए प्रमाणस्यो याङ्बा लिच्छाला ताङरि दोबा मुला ।

तामाङ समुदायदा ग्योइसेर (शिक्षा) थुमरि तोर थिबा थेन नाम्छाला (पेशागत) गुणस्तरीयतादा म्युङ्बा उद्देश्यला छ्याम क्याम्पसतेन सम्झौता लाबा शाखा चोहो लोप्चनसे पाङ्जि । ‘ग्युइसेर कमजोर तामा ह्याङ लिच्छा परतिचिमुला । ग्युइसेर ग्याम्से नाम्छाला गुणस्तरीयता बाबा सेम मुला’, थेसे पाङ्जि, ‘चुफिरि सोंचतिसिकेन निमा क्याम्पसतेन ङान्ना टिमसे छात्रवृत्ति सम्बन्धी सम्झौता लाबारि याङ्बा मुला । चुह्राङ्बा दुइसाङ्ला लागि क्याम्पस थेन क्याम्पस प्रमुख न्यौपानेज्यूदा आभारी फुल्ला ।’

संघ थेन क्याम्पस गुङरि स्योनाम डोबा तामाङ लोप्बोनदा छात्रवृत्ति पिन्बा नुररि ताबा सम्झौता उदाहरणीय गे ताबा तामाङ स्योमि संघ जोङ शाखाला संरक्षक थेन स्हेङ्खेन चोहो युनिक रक्षक ग्लानसे पाङ्जि । छ्यामरि थेसे तामाङ समुदायला शैक्षिक उन्नतिला लागि क्याम्पससे पिन्बा छात्रवृत्तिला लागि क्याम्पसदा थुजेछे पिन्जि । ‘क्याम्पससे स्योनाम डोबा सेम लाबा तामाङ समुदायला लोप्बोनदा छात्रवृत्ति पिन्बा प्रतिबद्धता लासि सम्झौता लाबा मुला’, थेसे बिजि, ‘चुला लागि क्याम्पस दिमथेमेदा सेमहेन्से थुजेछे ।’ थेसे क्याम्पसला उन्नति काप्सिकेन निगाइ बिसि ज्याबाम्हान्बा पिन्जि ।

चुह्राङ्नोन लासि शाखाला ग्रोइपा ओसेम ङ्हाच्छाला चोहो सन्तोष योन्जनसे क्याम्पसतेन स्यान्दो नुररि नोन ह्रोगे लाबारि खाम्सेला ताम थान्जि । क्याम्पससे छात्रवृत्ति पिन्मा ह्राङ्जुगुसे नोन ह्राङ्ला याङ्पाङ्दिम (संचारगृह)रि क्याम्पसला लोप्बोनजुगुदा प्रशिक्षार्थी स्योमि (इन्टर्न) लापुङ्बारि खाम्सेला मुला बिसि पाङ्जि । ‘ङानि क्याम्पसतेन ल्हानान ह्रोगे लाबारि खाम्ला’, थेसे बिजि, ‘ङान्छे दातेन चु क्याम्पसरि स्योनाम नुर डोबा लोप्बानदा ङान्ना याङ्पाङ्दिमरि इन्टर्न लापुङ्बारि खाम्ला ।’

२०४८ दिङरि स्हेङ्बा क्याम्पस तिबादुइरि डिल्लीबजाररि मुबा । दिङ ङि दोना चलप आतामाहेन्से बाँसबारीरि ल्हेबा मुबा ।