याम्बु । दातेला व्हाइखा समुहसे जाम्बुलिङ व्हाइखा दिवसला दुइसाङरि व्हाइखा पोप ‘आदिम प्रेमको गीत’ला काठुइ थेन विशेष व्हाइखा डोबा गेताङ स्हेङ्जि ।

शान्ति थेन समावेशिताला लागि व्हाइ याखारगि चाम बिबा मुख्य भावला छ्याम ङ्योइसाङ लाबा चु गेताङरि डा. बालराम अधिकारी, रजनीमिला थेन केशव सिग्देलसे सेमताम थान्मुबा ।

गेताङला तिबारि संचालक सञ्जय सुमनसे जाम्बुलिङ व्हाइखा दिवसला ङोसेबा पिन्बान व्हाइखा ल्होलो ग्योइ थेन सांस्कृतिक किन्बापिन्बाला प्रमुख माध्यम ताबा बिसि पाङ्जि ।

डा. बालराम अधिकारीसे निबा अढाइ दशकरि व्हाइखा मोक्कोन बिमा ल्हाना दोःबा विधा हिन्ना तासाइ देन्बारि चुनोन मुतेबा बिमा विवादास्पद थेन कादे दुइरि दोःबारिन आखाम्बा तामुला बिसि पाङ्जि । व्हाइखा दोःबाला चुनौतीफिरि चर्चा लाबान थेसे मुल ब्रिखेनतेन ह्रोगे थेन ग्योइ परिष्कारला तोबारि बाङ पिन्जि ।

थेह्राङ्नोन लासि रजनीमिलासे प्रख्यात व्हाइखाब्रिखेनजुगु वाल्ट ह्विटम्यान थेन जोन मिल्टनला सन्दर्भ थान्बान पोपरि ह्रुप्बा नेपाली व्हाइखाजुगु संरचनागत थेन नुरगत लिरि उत्कृष्ट मुला बिसि पाङ्जि ।

केशव सिग्देलसे दोःबाला ल्होलो पक्षला चर्चा लाबान पोपला व्हाइखाजुगुला विश्लेषण थान्बा मुबा । थेसे विशेष लिरि चेगाइ व्हाइखारि व्यक्त लाबा चेगाइला प्रकृति थेन ज्यो (शैली)ला गहन चर्चा लाजि ।

सुगम एकेडेमी, छार बानेश्वररि ताबा परिचर्चा लिच्छा व्हाइखा डोबा मुबा । चु सत्ररि प्रमोद स्नेही, भीष्म उप्रेती, विमल भौकाजी, टङ्क उप्रेती, सुमन थापा ‘संगम’, सुमी लोहनी, शोभा शरभ, सुवास सिंह पराजुली, रूपसिंह भण्डारी, दिल कुमारी डंगोल, सबिता गौतम दाहाल, हिरादेवी वाइबा, विनायक पन्त, नरेन्द्रबहादुर श्रेष्ठ, देवेन्द्र अर्याल ‘आँसु’ थेन ईश्वर थोकरला छ्याम व्हाइखाब्रिखेनसे ल्होलो नुरला व्हाइखा डोजि ।

गेताङला लिच्छारि दातेला व्हाइखा समुहला ह्रोम्हि व्हाइखाब्रिखेन धीरकुमार श्रेष्ठसे थुजेछे पिन्बान बोकिन्बा मुतेबादा आभार प्रकट पिन्जि ।

गेताङसे व्हाइखा शान्ति थेन समावेशिताला कोङ्बा माध्यम दोबारि खाम्ला बिबा सन्देश पिन्बान ग्योइ थेन सांस्कृतिक ल्होलोला उजागार लाबा अर्थपूर्ण दुइसाङ पिन्बा मुबा ।