गोदावरी मेयर कपरि तारकेश्वर थेन कोन्ज्योसोम च्योच्यो
हेराङ । याम्बुला तारकेश्वर नगरपालिका थेन हेराङला कोन्ज्योसोम गाउँपालिकासे उपत्यकाव्यापी पालिका न्हाङ्ला गोदावरी मेयर कप फुटबल प्रतियोगितारि च्योच्यो क्लाङ्बा मुला ।
मिरे स्ह्योरि च्यासाल चेरि ताबा क्लाङरि तारेकेश्वर थेन कोन्ज्योसोम १–१ गोलला च्योच्यो क्लाङ्बा हिन्ना । नामला कारण गोदावरी बहुउद्देश्यीय रंगशालाला चेरि क्लाङ ताबारि आखाम्माहेन्से च्यासाल चेरि क्लाङ्बा मुबा ।
ताचिबा प्रतियोगितारि चु गिक्छा च्योच्यो हिन्ना । तारकेश्वरला लागि सुजन महर्जन थेन कोन्ज्योसोमला लागि अनिल तामाङसे गोला लाजि । चु नतिजाला छ्याम समहु ‘डी’ ग्याम तारकेश्वर थेन कोन्ज्योसोमसे काकार बो थुइबा मुला ।
क्लाङ्ला म्यान अफ दि म्याच अनिलदा तारकेश्वरला मेयर कृष्णहरी महर्जन थेन कोन्ज्योसोमला प्रमुख कृष्णमान लामासे ट्रफि थेन न्होर पिन्जि ।
दारे ङ्हीनोन टोलीसे कीर्तिपुर नगरपालिकातेन प्रतिस्पर्धा लाबारि लेङ्बा मुला । न्हाबिङरे च्यासाल चेरि महालक्ष्मी नगरपालिका थेन बागमती गाउँपालिका गुङरि क्लाङ तासेला मुला । उपत्यकाला २१ गुङ्ला १३ पालिका गुङरि प्रतिस्पर्धा ताचिबा मुला ।
ड्वाफ्रे ३ गतेदोना चलतिबा प्रतियोगिताला डाबासे ५ बुम थेन स्यानडाबासे ३ बुम न्होर पुुरस्कार याङ्सेला मुला ।
(छिगला अर्थः हेराङ– ललितपुर, क्लाङ– खेल, बो– अंक, मिरे– मंगलबार, न्हाबिङरे– बुधबार, बुम– एक लाख, स्यानडाबा– उपविजेता)
तपाईको प्रतिक्रिया दिनुहोस