पोखरा । बुद्ध केवासाङ समारोह समिति कास्कीला ङ्योइसाङ थेन तामाङ बौद्ध सेवा समिति पोखरा १३ ओसेम ङग्युर छ्योखोर्लिङ गुम्बा कुँडहरला डिछ्याबारि धर्मदेशना गेताङ ताजि । सप्ताहव्यापी गेताङला न्हाङरि तिनि धर्मदेशना गेताङ ताबा हिन्ना ।

गेताङ नेपाल तामाङ घेदुङ संघीय कार्यकारी समितिला ह्रोचोहो दीपक वाईबा तामाङला ग्रेनडोन्बोरि ताबा मुबा ।

गेताङरि ग्रेनडोन्बो तामाङसे आदिवासी तामाङ समुदायरि बौद्ध धर्म धर्मरि जेक्खे सीमित आताना रिमठिम थेन संस्कृतिलान लिरि स्थापित ताजिन्बासे चुदा नुप्ना लासि गोतोबा ताम थान्जि । ‘तामाङ समुदायसे बौद्ध दर्शन व्हा धर्मदा ह्राङ्ला लोक केवा पद्दतीला छ्याम ग्युइल ग्योइकाइरि सुताइ ग्यारेम लाबा कारण बौद्ध धर्म तामाङ समुदायला फेआखाम्बा धर्म हिन्ना । तामाङ केमान बौद्धमार्गी हिन्ना’ थेला सेमतेन मुबा ।

गेताङरि नेपाल तामाङ लामा घेदुङ संघीय कार्य समितिला चोहो लामा गुरु पाल्देन योन्जनसे बुद्ध जीवनी थेन पञ्चशीलला नुररि दर्शदेशना लाबा मुबा ।

बुद्ध केवासाङ समारोह समिति कास्कीला चोहो टेकबहादुर स्याङ्बोला चोहोदानरि ताबा गेताङला संचालन गाउराइ विष्णु योन्जन थेन डेन सेमताम तामाङ बौद्ध सेवा समितिला गाउराइ शान्ति लोप्चन तामाङसे थान्बा मुबा ।

(छिगला अर्थः ग्यारेम– अभ्यास, ग्युइल– कला, ग्योइकाइ– साहित्य, डिछ्याबा– व्यवस्थापन, रिमठिम– संस्कृति, सेमतेन– विचार, नुर– विषय, सेमताम– मन्तव्य)