याम्बु । आदिवासी जनजाति उत्थान राष्ट्रिय प्रतिष्ठानला ह्रोचोहो रेशम गुरुङसे ग्युइसेररि तामाङजुगु स्यान्दो जात बिमा लिच्छा परतिबा बिसि पाङ्बा मुला ।

‘स्थानीय तहला बजेटरि तामाङ समुदायला सवाल’ नुरला काठुइ गेताङरि ह्रोचोहो गुरुङसे साक्षरता प्रतिशत खाम्दे ल्हेना लातोबारि बाङ पिन्जि । स्यान्दोला साक्षरता प्रतिशत बिमा तामाङकादे माइनसरि मुबा थेसे ग्रा पिन्जि ।

‘नेपालला साक्षरता प्रतिशत ७६.२ प्रतिशत मुला । तासाइ तामाङला साक्षरता प्रतिशत ६२.६० मुला । चु स्यान्दो बिमा माइनस १३.६० हिन्ना ।’ गुरुङसे बिजि, ‘स्थानीय तहसे फोकस लासेला हिन्साम दारे लोप्खाङ पुइदोला । बाइला साक्षरता प्रतिशत ८०.०७ प्रतिशत मुला । चुबिबा स्यान्दो बिमा प्लस मुला । गुरुङला च्यासाम ७४.३६ प्रतिशत मुला ।’

ग्योइ, ग्युइसेर थेन रिमठिम स्थानीय तहला याङ्ताम ताबासे स्थानीय तहसे चुरि ध्यान पिन्तोला बिसि थेसे पाङ्जि । थेसे न्होरला हैसियत नोन तोर थिबारि स्थानीय सरकारसे ध्यान पिन्बारि सेमताम थान्जि ।

‘एसडीजी २०३० मिट लासेला हिन्साम खालाइदा ग्याप्से थान्ना आदे । चोदे क्योङ्दा च्योच्यो स्होसेला हिन्साम तामाङदा न्होरला लिरि स्यान्दो च्योच्यो स्होतोला । ग्युइसेररि नोन स्यान्दो च्योच्यो स्होतोला । निजामतिरि नोन स्यान्दो च्योच्यो स्होतोला । चुला लागि स्थानीय सरकारसे ध्यान पिन्तोला ।’ गुरुङसे पाङ्जि, ‘चुला लागि संघीय सरकारसे नोन नीति स्होतोला ।’

स्थानीय सरकारसे बजेट स्होइ लाबा दुइरि स्थानीय तहला प्रमुखकादेला ध्यान छेङ्बारि तामाङ स्योमि छेनसे ङ्योइसाङ लाबा गेताङ आउदिन सान्दर्भिक ताबा गुरुङसे पाङ्जि ।

गेताङरि काभ्रे मण्डनदेउपुर नगरपालिकाला प्रमुख टोकबहादुर वाईबा, काभ्रे रोशी गाउँपालिकाला चोहो दिनेश लामा, ललितपुर कोन्ज्योसोम गाउँपालिकाला चोहो कृष्णमान लामा, बागमती गाउँपालिका चोहो बीरबहादुर लोप्चन, धादिङ रुबीभ्याली गाउँपालिका चोहो रामसिंह तामाङ, रसुवा आमाछेदिङ्मो गाउँपालिका चोहो बुचुङ तामाङ, दोलखा मेलुङ गाउँपालिका चोहो हिराकुमार थोकर, याम्बु गोकर्णेश्वर नगरपालिका उपप्रमुख सान्नानी लामा थेन काभ्रे तिमाल गाउँपालिका ह्रोचोहो दलमान थोकरसे तामाङ समुदायला थुमरि दातेदोना ह्राङकादेसे लाबा गेफिरि ग्रा पिन्बा मुबा ।

(छिगला अर्थः ग्युइसेर– शिक्षा, नुर– विषय, काठुइ– छलफल, रिमठिम– संस्कृति, याङ्ताम– अधिकार, स्योमि– पत्रकार, छेन– संघ)