हेराङ । बागमती गाउँपालिकाला ङ्योइसाङरि ताम्बा (म्रावाइसिंगे) प्रशिक्षण थेन अन्तरक्रिया गेताङ तिबा मुला । ड्वाफ्रे १ गतेहेन्से सोमरेदोना चलतिसेला गेताङ वडा नं. ४ प्युटाररि पालिका नाङ्ला गोरङिस वडाकादेला ताम्बाकादेदा गिक्खेन ग्लारि पोप्सि प्रशिक्षण पिन्बा हिन्ना ।

वागमती गाउँपालिकारि मुबा तामाङ समुदायला रिमठिम सोना लाबा उद्देश्यला छ्याम ताम्बा संस्कार तालिम संचालन लाबा हिन्ना । गेताङ वडा नम्बर ४ ला वडाचोहो रामकुमार लामाला चोहोदानरि ताबा मुबा । लामासे गेताङ ठ्वाङ्सेन लासि पाङ्जि, ‘तामाङ ग्योइ, रिमठिमला ङोसेबा सोना लाबारि चुह्राङ्बा गेताङकादेसे महत्वपुर्ण भुमिका क्लाङ्बा मुला ।’

गेताङला ङ्हीछा रे तिनि पालिकाला ङिस वडा ग्याम सोम–सोम म्हे ताम्बाकादेसे बोकिन्सि बन्दसत्र संचालन तासेला मुला । चुदुइसाङरि बोकिन्बा ताम्बाकादेदा तामाङ समुदायला माउलिक बाजा डम्फु बोठासेला मुला । बन्दसत्ररि रिमठिम ख्युछ्र्या, ग्योइला ल्हेछ्या थेन ताम्बा परम्पराला निरन्तरताफिरि काठुइ तासेला ङ्योइसाङजुगुसे ग्रा पिन्बा मुला ।

गेताङ गाउँपालिका चोहो वीरबहादुर लोप्चनला ग्रेनडोन्बोरि ताबा मुबा । लोप्चनसे ताम्बाकादेदा एकता ताना लासि रिमठिम ख्युछ्र्या लाबारि देबाः तागाइ बिसि बागमती गाउँपालिकासे ताम्बा प्रशिक्षण गेताङ थान्बा हिन्ना बिसि पाङ्जि ।

चोहो लोप्चनसे बिजि, ‘ताम्बादा तामाङ जातला वंश थेन वंशावली थाहा ताला । वंश ठुङ्बा थेन दोङरापला ग्युइ थोबा ताम्बासे तामाङला ब्रेल्साङला ठिम स्होबा तामुला । चुह्राङ्बा ऐतिहासिक महत्व तोबा ताम्बा परम्परादा ह्याङ्से म्हाना लाला आदे ।’

गेताङरि विशिष्ट डोन्बो प्रमुख प्रशासकीय अधिकृत बालकृष्ण थापा, स्यान्दो डोन्बोकादे वडाचोहोजुगु ज्ञानबहादुर लो, नारायण भोम्जन, होमप्रसाद बजगाईतेन स्यान्दो ल्होलो थुमला प्रतिष्ठित म्हिकादे मुबा ।