हेराङ । बागमती गाउँपालिकाला ङ्योइसाङरि ड्वाफ्रे १ गतेहेन्से ३ गतेदोना ताबा ताम्बा (म्रावाइसिंगे) प्रशिक्षण थेन अन्तरक्रिया गेताङ जिन्जि । गेताङ गाउँपालिकाला वडा नं. ४ प्युटाररि मुबा श्री कालिदेवी माध्यमिक लोप्खाङला सभाहलरि ताबा मुबा । गेताङरि पालिका न्हाङ्ला गोरङिस वडाकादेला ताम्बाकादेदा ग्लागिरि पोप्सि प्रशिक्षण पिन्बा मुबा ।

पालिकाला आन्सार तामाङजुगुला रिमठिम सोना, ल्हेना थेन छार्ना लाबाला छ्याम छार पुस्तारि रिमठिम हस्तान्तरण लाबा उद्देश्यसे ताम्बा तालिम संचालन लाबा हिन्ना ।

गेताङ गाउँपालिकाला चोहो वीरबहादुर लोप्चनला चोहोदानरि ताबा मुबा । चोहो लोप्चनसे ला गि न्हाङरि चु प्रशिक्षणला महत्वपूर्ण नुरदा ह्रुप्सि ‘ताम्बा दस्तावेज छ्योइ’ तेसेला ग्रा पिन्जि । थेसे चु प्रशिक्षणसे तामाङला दोङराप गोना थेन सेना लाबारि ज्याबा भुमिका क्लाङ्बा बिसि प्रशंसा लाजि ।

गेताङला विशेष डोन्बो गाउँपालिकाला ह्रोचोहो भक्तबहादुर दर्लामीसे चुह्राङ्बा गेसे तामाङला ग्योइ, रिमठिम थेन ङोसेबा कोङ्ना लाला बिसि पाङ्जि । थेसे नेपालरि लोडसेडिङ नुप्ना लाबा अभियन्ता कुलमान घिसिङदा डान्बान बिजि, ‘तामाङकादेसे राज्यरि प्रमुख भुमिका याङ्जि बिसाम ज्याबा गे लासेला मुला बिबा उदाहरण कुलमान घिसिङसे उन्जिन्बा मुला ।’

गेताङला चोहो वडा नं. ४ ला वडाचोहो रामकुमार लामासे तामाङ्ला दोङराप सोना लासि थान्बा ताम्बाजुगुला गेताङ ह्राङ्ला वडारि थानम्याङ्मा ताङ्बा छोर्बा बिसि पाङ्जि ।

गेताङरि वडा नं. २ ला वडाचोहो रामबहादुर ब्लोनसे नोन सेमताम थान्बा मुबा ।

ताम्बा छेन (संघ)ला खेन्पोजुगुतेन ताबा काठुइदा योनान ह्रुप्सि कार्यपत्र तयार लासेला ताम संयोजक चन्द्रबहादुर घलानसे जानकारी पिन्जि ।

जोम्ना ग्याम बागमती गाउँपालिका स्तरीय ‘ताम्बा छेन (संघ)’ तदर्थ समिति नोन स्होबा मुला । समिति प्रशिक्षक मङ्गलकृष्ण घलान थेन दिलबहादु थिङला राप्बारि स्होबा हिन्ना ।

समितिला चोहोरि चन्द्रबहादुर घलान, ह्रोचोहो लालबहादुुर लो, गाउराइरि केदारमान ब्लोन, न्होरचोहोरि लवाङदोर्जे बोम्जन थेन ह्रोम्हिकादेरि सोमबहादुर डिम्डुङ, धनबहादुर ब्लोन, सुर्यबहादुर थिङ मुला ।

गेजिन्बा दुइरि ल्होलो बुद्धिजीवि, समाजसेवी, तामाङ ग्योइ थेन रिमठिम सम्बन्धीला खेन्पोकादेसे उल्लेख्य बोकिन्बा मुबा ।