याम्बु । व्हाइखाब्रिखेन निरुभक्त वाईबा तामाङला छार व्हाइखा पोप ‘ओ प्रिय मनजङ्गल’ ९ ड्वाफ्रे, सुङरेकुनु सार्वजनिक ताबा मुला ।

छ्योइ तेबाः एससीआरसीसे याम्बुला तामाङ अध्ययन प्रतिष्ठान, खास्योररि गेताङ स्होसि नेपाल सरकारला ङ्हाच्छाला गाउराइ धनबहादुर तामाङ ग्याम विमोचन लापुङ्बा हिन्ना ।

गेताङरि ग्रेनडोन्बा तामाङसे प्रकृतिदा चेगाइ लाबासे ह्राङ्ला साप्रा, ह्युल्बा, रिमठिम मुतेबादा चेगाइ लाला बिबा सन्देशला छ्याम चु छ्योइ खाबा मुला बिसि पाङ्जि ।

समुदायला सांस्कृतिक छोरुवा बाबाहेन्से नाचिबा काक्ताला उजागर लाबा गे चु छ्योइसे लाबा उल्लेख लाबान थेसे आमाग्योइरि ब्रिबारि आख्लाबारि सुझाब पिन्जि ।

ब्रिखेन रविन्द्र तामाङसे ग्योइ, ब्रिबाज्यो च्यामा नेपाली ग्योइकाइरि ज्याबा थेन उत्कृष्ट छ्योइला लिरि ‘ओ प्रिय मनजङ्गल’ खाबा ताम थान्जि ।

थेसे पाङ्जि, ‘ह्रोला व्हाइखाजुगुरि ताम्सालिङला चिन्ता मुला, याम्बुला चिन्ता मुला । दारे चुह्राङ्लासि नितोला होइ बिसि ब्रिखेन ग्यालाम उन्बा व्हा ह्राङ्ला निचोड नोन थान्बा झान ज्याबा तासेला मुबा ।’

ब्रिखेन खोजराज गोलेसे नोन निरुभक्तला व्हाइखासे तामाङला ल्होलो मुद्दाजुगुफिरि साम्लो, काइ रेन्बा बिसि पाङ्जि ।

गेताङरि छ्योइ ब्रिखेन निरुभक्त वाईबासे तामाङला नुरकादेदा स्यान्दो ग्योइरि नोन खाराङ्लासि पाङ्बारि खाम्ला बिसि चु छ्योइ बाबा सेमताम थान्जि ।

‘चु छ्योइरि ह्याङ्ला रिमठिम, संस्कार, दोङरापला ताम, ठुङ्सा थेन सभ्यताला ताम जेक्खे आताना बौद्ध दर्शनला ताम नोन मुला । ङाला सेम थुर्बा दार्शनिक पाटोला तामजुगु नोन बाबा बाङ लाबा मुला ।’ ब्रिखेन वाईबासे बिजि, ‘चुमि ङाला बिम्ब हिन्ना । बिम्बला स्हेग्याम ङाइ ङाला तामजुगु उल्लेख लाबा मुला । खस नेपाली ग्योइरि बासाइ नोन तामाङला तामकादे, मिथककादे, दोङरापला पाटो माङ्ग्यार उन्बा प्रयास लाबा मुला ।’

१०३ पेजाला चु छ्योइरि ३६ वटा ल्होलो नुरस्हे ह्रुप्बा व्हाइखा पोप्बा मुला । चु ङ्हाच्छा व्हाइखाब्रिखेन वाईबासे ‘ह्याङदा थोबो जुसी रप्ना लबा खला ?’ व्हाइखा पोप थेन ‘ग्ले तगुर’ चेमा बजाररि बाजिन्बा मुला ।

(छिगला अर्थः छोरुवा– जागरण, नाबा– भोगेको, काक्ता– समस्या, क्योइका– समीक्षा, ज्यो– शैली, साम्लो– चिन्तन, नुर– विषय, सेमताम– मन्तव्य, स्हेग्याम– माध्यम, चेमा– नाटक)