याम्बु । नेपाल आदिवासी जनजाति स्योमि गेन्दुनछेन (फोनिज)ला पदाधिकारी थेन ह्रोम्हिकादसे नेपाल स्योमि गेन्दुनछेनला पदाधिकारीकादेतेन ह्रुप तासि गेन्दुनछेनला संस्थापक नुर योना जिन्ना लाबारि दोरि ध्यानाकर्षण लाबा मुला ।

लानिरे गेन्दुनछेनला केन्द्रीय गेदिमरि ङ्ही नोन पक्षला काठुइ ताबा हिन्ना । काठुइला ताङरि फोनिजसे गेन्दुनछेनला चोहो निर्मला शर्माला छ्याम पदाधिकारीकादेदा संस्थापक सम्बन्धी नुर लासोम न्हाङरि जिन्ना लाबारि म्होइजेन लासि ज्ञापनस्यो पिन्बा हिन्ना ।

फोनिजला ग्रेनगाउराइ समीर बलामीला आन्सार ज्ञापनस्योरि गेन्दुनछेनला २७ छा जोम्नाला बन्दसत्रला निर्णयदा कार्यान्वयन लासि संस्थापकला नुर जिन्ना लाबारि त्रिभुवन विश्वविद्यालयला क्योङयान्पाङ ओसेम स्योनाम विभाग थेन दोङराप विभागला पदाधिकारीकादे मुबा डोबा कार्यदल स्होबारि ह्रिबा मुला ।

फोनिजला अडान आन्सार, वि.सं. २००८ दिङ दुग ९ गते स्होबा थेदुइला नेपाल स्योमि छेनला तदर्थ समितिदा नोन संस्थापक तेन्तोला । वि.सं. २०१२ रि दोसि स्होबा समितिदा जेक्खे संस्थापक तेन्मा तिबाला प्रयास थेन योगदानला वेवास्ता तासेलासे ङ्ही नोन पक्षदा न्याय ताबा लासि समावेशी निष्कर्षरि दोतोबा फोनिजला धारणा मुला ।

ह्रुपला ताङरि गेन्दुनछेन चोहो निर्मला शर्मासे फोनिजला ह्रिबाबारे केन्द्रीय समिति चिसाङरि काठुइ लासि तोबा निर्णय किन्सेला ग्रान पिन्जि । थेसे अग्रज स्योमिकादेला ग्रोइ थेन सुझावला दानःरि टुंगोरि दोसेला पाङ्जि ।

गेन्दुनछेनला वरिष्ठ ह्रोचोहो दीपक आचार्यसे नोन नुर संवेदनशील ताबासे तोबा प्रक्रिया थेन परामर्शग्याम निष्कर्षरि दोसेला सेमताम थान्जि ।

फोनिजला चोहो लक्की चौधरीसे वि.सं. २००८ दिङदा दानः तेन्सि गेन्दुनछेनला दोङरापरि दिङ ब्लि काप्सेला उल्लेख लासि गाइना आलाना ऐतिहासिक न्याय सुनिश्चित लातोबा पाङ्जि । थेसे संस्थापक टुङ्गो ल्हागाब लाबा अभियानरि फोनिजसे क्योङ ह्रो लाबा ग्रान पिन्जि ।

थे दुइसाङरि गेन्दुनछेनला ग्रेनगाउराइ रामप्रसाद दाहाल, न्होरचोहो रामकृष्ण अधिकारी, गाउराइ थेन स्यान्दो ह्रोम्हिकादेसे बोकिन्बा मुबा ।

फोनिज ग्याम ह्रोचोहो अन्जना शिल्पकार, गाउराइ सुनिल महर्जन, न्होरचोहो अर्जुनबहादुर तामाङतेन स्यान्दो पदाधिकारी थेन ह्रोम्हिकादेसे बोकिन्बा मुबा ।

छ्यामरि, नेवाः राष्ट्रिय दबुला पदाधिकारीकादेसे नोन बोकिन्बा मुबा ।

(छिगला अर्थः नुर– विषय, गेन्दुनछेन– महासंघ, स्योमि– पत्रकार, ह्रोम्हि– सदस्य, गेदिम– कार्यालय, काठुइ– छलफल, क्योङयान्पाङ– आमसंचार, स्योनाम– पत्रकारिता, छेन– संघ, चिसाङ– बैठक, ग्रान– प्रतिबद्धता, ग्रोइ– सल्लाह, दानः– आधार, सेमताम– मन्तव्य)