सिन्धुपाल्चोक, लिसंखु पाखर गाउँपालिका–२ ह्रिस्याङ्गोरि दिङ दाङसे ड्वाफ्रेरि तासि खाबा पाठि जात्थार थुम्बा मुला । चुपाल्से बिसाम ड्वाफ्रेला छेपा चुख्रिक (११) वा ड्वाफ्रे (जेठ) २३ कुनु तिसि २४ गते थुम्बा हिन्ना ।

ड्वाफ्रेरि ला छ्योत्पा (भूमि पूजा) लिच्छा न्हि रे दोेना ताबा चु जात्थार ओन्मा हेन्सेन ह्रिस्याङ्गोरि तासि खाबा हिन्ना । ङ्हाच्छा ह्रिस्याङगोला साविक वडा नम्बर गिकरि मुबा म्लाङगाइ पाठिरि जात्थार ताबा मुबा । करिब ३५ सालरि केर हेन्से थे पाठिनोन फुप्पान खामाहेन्से जात्थार गोन्बो गाङरि तासि खाबा हिन्ना बिसि नाम्साला गान्बाजुगुसे पाङबान खाबा मुला ।

चु रेमरि बिसाम जात्थारला दुइसाङरि लिसंखु पाखर गाउँपालिकाला ह्रोरि सांस्कृतिक गेताङनोन स्हेङ्बा मुबा । गेताङरि, बिजय लामा, सन्जोक ह्योन्जन, जमुना ह्योन्जन, मदन ग्लान, सुमिना लो, बैरागी च्याङ्बा, अनिश ग्याबा, श्याम ह्योन्जन, सजन मोक्तान, सुनमाया थोकर (गगाली साइली), निर्मला मोक्तानलगायतसे व्हाइ गोबा मुबा । थेराङनोनलासि ताम्बा, बोन्बो थेन पन्चेबाजाला नोन् प्रस्तुति गेताङरि ताबा मुबा ।

लिसंखु पाखर–२ ला चोहो विजय ह्योन्जनला चोहोदनरि ताबा गेताङरि ग्रेनडोन्बो बागमति ह्युल्साखोरला मननिय सांसद माइली तामाङ, विशेष डोन्बो पालिकाला चोहो राजु लामा, ह्रोचोहो मिट्ठु लामालगायतसे ज्याबाम्हान्बा ल्हेङ्मो थान्मुबा ।