नुवाकोट ४ बेल्बो । नुवाकोटला तादी गाउँपालिकाला १७ छा गाउँसभा नाबिङरेकुनु जिन्बा मुला । गाउँपालिका चोहो सन्तमान तामाङला चोहोदानरि चिबा चिसाङसे न्होर दिङ २०८२÷८३ ला लागि नीति थेन गेताङ २०८२ प्रस्तुत लाबा हिन्ना ।

नीति थेन गेताङरि पूर्वाधार फेल्गेबा, ग्युइसेर, ल्हुइथाङ, थुङ्बाक्युइ, कृषिला आधुनिकीकरण, सामाजिक सुरक्षा, रोजगारी स्हेङ्बाला ह्राङ्बा थुमदा प्राथमिकता पिन्सेला ग्रान पिन्बा मुला ।

चिसाङरि ‘गेदुङ–गेन्दुन दर्ता थेन नियमन पेठिम– २०८२’, ‘थुङ्बाक्युइ सरसफाइ थेन चाङ्बा पेठिम– २०८२’, थेन ‘सार्वजनिक ग्लुबा नियमावली– २०८२’ सुताइ प्रस्तुत लाबा मुबा । थे गोरसोम विधेयकफिरि ग्रेन काठुइलिच्छा गाउँसभाग्याम क्योङडिक्सि पारित लाबा मुला ।

गाउँसभारि ह्रोचोहो, वडाचोहोकादे, स्यान्दो जनप्रतिनिधि, कर्मचारी थेन सरोकारवालाकादेसे रुङ्ना बोकिन्बा मुबा । 
ह्युलनाङ्ला ७५३ स्थानीय तहसे बेल्बो १० गते बजेट बातोबा प्रावधान मुला । तादी बागमती प्रदेशरिन नीति थेन गेताङ बाबा गिक्छा गाउँपालिका दोबा मुला ।

(छिगला अर्थः बेल्बो– असार, नाबिङरे– बुधबार, चिसाङ– बैठक, न्होर– आर्थिक, फेल्गेबा– विकास, ग्युइसेर– शिक्षा, ल्हुइथाङ– स्वास्थ्य, थुङ्बाक्युइ– खानेपानी, थुम– क्षेत्र, ग्रान– प्रतिबद्धता, गेदुङ–गेन्दुन– संघ संस्था, पेठिम– ऐन, चाङ्बा– स्वच्छता, क्योङडिक्सि– सर्वसम्मत)