खाल्दामालान लिच्छा खेबा ताला
बाङ्बान लिच्छा कमजोर ताला
चुम दाङ्बोसे सावित लाबा ताम हिन्ना
तिरेम साम्राज्यवादलान नुप्बा दुइ खाला ।
हिरोसीमारि बम छेप्जि एसे
नाकासाकीरिन बम रोप्जि,
फासीवादी इजरायल पुइसिनाम
प्यालेस्टाइनरि सामूहिक नरसंहार लासिनाम,
ल्हानान निहत्था ह्युल्बा साइजि ।
ए अमेरिकी सरकार !
थादोगो ए युद्धला सरदार
लासि चिमुला न्यायचोबो ह्युल्बासे
साम्राज्यवादी ठिमला लिब्रोरि खबरदार ।
भियतनामी युद्ध डान्गो एसे
चिनियाँ युद्धनोन डान्गो
हतियार थेन युद्धला छोङ्से
ह्राङ्लान ह्युल जम्बुलिङसे
संकटरि ग्युरु फाप्सि निबान म्राङ्गो ।
सुलेमानीतान सेजि एसे,
कर्णेल गद्दाफी थेन सद्दामतान सेजि,
खाइ खानाङ मुला एला प्रजातन्त्र ?
खानङ म्हाजि खाइ एला मानवता ?
क्योङ ह्युल्बासे ङ्योइबाकेन मुला
चु जम्बुलिङ ग्याम्से
युद्धला छोङ्मि खाला ?
फासीवादी युद्धला मतियार खाला ?
युद्ध अपराधी खाला ?
कठघरारि राप्बा पालो खाल्ला ?
ए अमेरिकी सरकार !
थादोगो ए आतंककारीला मतियार
लासि चिसेलामुला न्यायचोबो ह्युल्बासे
आतंकवादी ठिमला लिब्रोरि खबरदार ।
खाइमा लाला छोङ युद्ध
खाइमा ल्हेनालाला भन्सार कर,
ह्राङ्से ख्वाबा व्हाङरि
ह्राङ्नोन वाङ्ला बिसिनाम
लोङ्सि चिला खाइमादाम्मान ल्होकल्होक ।
ए अमेरिकी सरकार !
थालाउ एसे कागजला
च्यान दोबा ख्योल्बा रेमरेम
लासि चिमुला समाजवादी ह्युल्बासे
पुँजीवादी ठिमला लिब्रोरि खबरदार ।
काभ्रे ।
तपाईको प्रतिक्रिया दिनुहोस