कौशल्या आमा स्ह्योरि योनान रेजि । चियाला कप यारि किन्सि थे टेलिभिजनला तामसोर च्याबारि चुजि ।

‘सीमारि दोसि झडप’, ‘सैनिक ङ्ही घाइते’, ‘याखारगि डोङ्जि’ । थेसे कप टेबलरि थान्जि ओम मिनाङ मिख्लि ताना लाजि । थे ‘याखारगि’ थेला कोला ताबारि खाम्सेला मुबा । ताबारि नोन खाम्सेला– तिल्दाबिसाम थेला कोला ङ्ही गुङ्ला याखारगि सेना शिविररि मुबा, स्यान्दोचा प्रहरी सेवारि ।

थेनोन दुइरि म्रापग्याम काइ खाजि– ‘आमा, ङा निजि होइ, ड्युटीरि गाइला ।’

कोला प्रविन प्रहरी अधिकृत । थेसे ज्युमङेसि मिख्लि छुम्सि पाङ्जि, ‘ध्यान थान्गो ह्राङ्ला ।’

प्रविण म्रापग्याम माङग्यार थोन्माहेन्से थे म्रापछाङरि रापनिजि, मि मुरिक्यार क्युर्जि । सेमसेमरि बोडोक्जि, ‘ओ कोन्ज्योसोम ! दारे कादे गान्धारी दोबारि लेङ्बा मुला ङानि आमाकादेसे ?’

थेनोन म्हुना थेसे म्हाङ म्राङ्जि । म्हाङरि गन्धारी राप्चिबा मुबा– म्लाङ गोइलोरि, पाट्टी खिबा मिरि ओम न्हाङन्हाङरिन क्रोचिबा आत्मारि ।

गान्धारीसे कौशल्यतेन ङ्योइजि– ‘ङाला केबा खाइमा थुम्ला कौशल्य ? कादे युग ल्हागतिसेला मुला दारे निःसन्तान आमाकादेला राप जिन्बारि ?’

कौसल्यासे निसाल पिन्जि– ‘गान्धारी देवी, खाइमादोना सत्ताला सिंहासनकादे युद्धला नक्सा ब्रिला, थेदुइदोना एला केबासे ङान्दा ख्लासेला आरे । ङान्ना मातृत्व दोसिन क्योइला बलिदानला उमालरि ।’

गान्धारी कुटिसि चिजि, मिख्लि ब्योङ्बारि चुजि । कौशल्या फेतछोर्जि– ल्हुइ टुसे छ्योपबाप्बा, तिङ दातेदोना दार्चिबा । 

थे स्ह्योरि थेसे प्रविणला फोन थिजि ।

‘आमा, ङादा ज्याबान मुलला, तिनि दिमरि खाबाकेन मुला ।’

कौशल्या ज्युमङेजि तासाइ मिला गुग्याम दोसि मिख्लि ब्योङ्जि । तिल्दाबिसाम थेसे गोबा मुबा, स्यान्दो खाजिबाइ कौशल्याला दिमरि तिनि गान्धारी दोसि छोर्बा मुला ।

मिरिक, दार्जीलिङ, भारत ।

(छिगला अर्थः केबा– सराप, राप– कथा, निसाल– उत्तर, उमाल– तराजु)

दोःबा : यकिना अगाध