चारु मजुमदार याखारगि भारतीय कम्युनिष्ट क्रान्तिकारी नक्सलवारी योद्धाला मिन हिन्ना । थेला केवा क्रान्तिरि आधारित विम्बसे प्लिङ्बा थेन आशाला होइस्हेर ड्वाचिबा प्रेरणाला श्रोत दोचिबा मुला ।

थेला केवागाथासे क्रान्तिला ग्यामरि ङ्हाच्छा वाङ्चिबारि क्रान्तिकारी कम्युनिष्टजुगुदा आटाङ्बा प्रेरणा पिन्चिबा मुला । मुतेबा सर्वहारावर्ग—सानाम्पा, गेनाम्पा थेन दुल्बा, ङ्हाप्बा ओसेम आदिवासी ह्युल्बादा ग्यालाम उन्चिबा मुला । थे सिपिआई माक्र्सवादी न्हाङरि छार्बाकेन लाबा सोभियत संशोधनबादला लिब्रोरि निर्ममताला छ्याम वैचारिक लडाई लड्तिबा चर्चित कम्युनिष्ट नेता न्हाङरि परतिमुला ।

थेला केबा न्हुप पश्चिम बंगालला सिलिगुढीला याखारगि प्रगतिशील भूमिपतिला दिमथेमेरि सन १९१८ रि ताबा मुबा । मजुमदार क्रान्तिकारी संगठन नक्सलवादी संगठनरि वाङ्खिबा मुबा । थेसे १९६८ रि नक्सलवारी आन्दोलनला ऐतिहासिक पुस्तक ब्रिबाला छ्याम ल्हानान क्रान्तिकारी दस्तावेजजुगु ब्रिबा मुला । थे दस्तावेजजुगु दार्से क्रान्तिकारी विचारला स्ह्रुगरि मालेमाला मार्गदर्शन सिद्धान्त दोबा मुला । थे दस्तावेजजुगु चारु मजुमदारला गोर ब्रे दस्तावेजला मिनसे सुप्रशिद्ध मुला ।

थेला आपा भारतीय ह्राङ्बाङ्पा सेनानी मुबा । थेसे सन १९३८ रि कलेजला डोबा ख्लाबा मुबा थेन सन १९४६ रि तेभागा (त्रिखुट्टी) सानाम्पा ङ्योलोकरि बोकिन्बा मुबा थेन सन १९६२ रि तिगाइ दुइला लागि जेल परतिबा मुबा ।

कलेजला खेडोबलिच्छा थे १९३७—३८ रि भारतीय ग्याल्साङ कंग्रेसरि सामेल ताबा मुबा थेन बिंडी गेनाम्पाजुगुदा संगठित लाबा ङ्योलोकरि वाङ्बा मुबा । थेलिच्छा थे भारतीय कम्युनिष्ट पार्टी (सिपिाआई) रि वाङ्सि सानाम्पाला मोर्चारि गेलाबारि चुजि । कम्युनिष्ट पार्टीला कार्यकर्ता ताबासे गिरफ्तार लाबा वारन्ट थामाहेन्से थे भूमिगत ताबारि बाध्ये ताबा मुबा । तासाइनोन ङ्हिछा विश्व युद्धला चुबा छ्याम सिपिआईफिरि प्रतिवन्ध ल्हागाब लाबा मुबा । तासाइ नोन थेसे सिपिआईला कार्यकर्ताला स्ह्रुगरि सानाम्पाजुगुला गुङरि गे लाचिजि थेन सन १९४२ रि सिपिआईला जलपाईगुडी जोङ दाछोकला ह्रोमि दाम्जि । चु कृयाशीलतासे थेदा जलपाईगुडीला अनिकालग्रस्त थुमला पीडित ह्युल्बाजुगुला ह्रोला लागि भूमिपतिजुगुला बाली कब्जा लाबा थेन सानाम्पाजुगुदा संगठित लाबा हौशला याङ्जि ।

चु घटना १९४३ ला हिन्ना । थे चु अभियानरि हदगि दोना सफल ताजि । थे सन १९४६ रि तेभागा ङ्योलोकरि सरिक ताजि ओम न्हुप बंगालरि सर्वहारा क्रान्तिकारीजुगुला संघर्ष चुजि । थेला क्रान्तिकारी संघर्षसे आकार किन्सिकेन निजि । थेलिच्छा थे दार्जिलिङला चिया वानला गेनाम्पाजुगुदा संगठित लाबा गेरि वाङ्साइ नोन ग्योइला ङ्यान्दिसे ओते सफल आतानि ।

सन १९४८ रि सिपिआईफिरि सरकारसे प्रतिवन्ध ल्हागाब लाजि । मजुमदारदा दिङ सोम जेलरि युजि । जलपाईगुडीला सिपिआईला ह्रोमि ओसेम ह्रो लिला सेनगुप्तातेन सन १९५४ रि ब्रेल्साङ लाजि । ब्रेल्साङ लिच्छा ङ्हिसेन ग्यालठिपा गतिविधिला केन्द्रविन्दु सिलिगुडीरि ल्हेजि । थेरि नाबा आपा थेन ब्रेल्साङ आलाचिबा आङा प्राङ्ग्यालला कठिन रेजुगु थाचिबा मुबा ।

सन १९६० ला गुङरिक्यार मजुमदारसे न्हुप बंगालरि ख्रुश्चेभी संशोधनवादला लिब्रोरि सिपिआई माक्र्सवादी वामपन्थी छोक्बा स्हेङ्जि । 

सन १९६७ रि थेला ह्रो कानु सन्याल थेन जंगल सन्थालला छ्याम डिक्सि नक्सलवारीरि सानाम्पाजुगुला शसस्त्र ङ्योलोक चुजि । चु नक्सलवारी छोक्बान लिच्छा निसि नक्सलवादी मिनसे चर्चित ताजि । चुनोन दुइरि मजुमदारसे गोरब्रे दस्तावेजजुगु ब्रिजि । चु दस्तावेज चारु मजुमदारला ऐतिहासिक ब्रे दस्तावेजला मिनसे प्रशिद्ध ताबा मुला । चुसे वैचारिक धरातल स्हेङ्जि ओम क्रान्तिला ग्याम सशस्त्र तासेला मुला थेन चिनीया कम्युनिष्ट पार्टीसे किन्बा क्रान्तिकारी ग्याम तासेला मुला बिसि व्याख्या लाजि ।

थेनोन दिङ सिपिआईग्याम फेबा धार थोबा अखिल भारत कोअर्डिनेशन कमिटी अफ कम्युनिष्ट रिभुलुशनरी स्हेङ्जि बिसाम थेदान सन १९६९ रि भाकपा माले (माक्र्सवादी—लेनिनवादी)रि पोसि मजुमदार थे पार्टीला ग्रेनगाउराइ दोजि बिसाम जंगल सन्थाल, कानु सन्याल ओसेम सरोज दत्ता थेला महत्त्वपूर्ण बैचारिक ओसेम सांगाठानिक ह्रोजुगु मुबा । थे सन १९७२ ला जुलाई १६ कुनु भूमिगत चिबा ग्लाग्याम भाकपा माले बंगाल युनिट चलप लाचिबा दिपक विश्वासला गद्दारीला ङ्यान्दिसे कलकत्तारि चुङ्बा मुबा । थेदा १० रेदोना कलकत्तारि बन्दी स्होथान्सि यातना पिन्बा मुबा । थेदुइरि चारु मजुमदारदा कानुनी क्योन्बाला लागि कानुन छोङ्नापा, दिमथेमे ओसेम चिकित्सकतेन ह्रुप ताबारि अनुमति पिन्बा आरेमुबा । लाल वजारला प्रहरी हिरासत ह्युलनाङलान मोक्कोनबिमा भयानक थेन क्रूर यातना दिमला स्ह्रुगरि बद्नाम मुबा । थेनोन प्रहरी हिरासततरि जुलाई २८, १९७२ स्ह्योला ४ ङ्ह्यामा प्रतिक्रियावादी ग्याल्सा सत्तासे थेदा जेलन्हाङरिन सेबा मुबा ।

चारुम मजुमदारला छेन्दे सुताइ सरकारसे थेला दिमथेमेदा पिन्बारि अस्वीकार लाजि । प्रहरी थेन थेला थेरि मुबा दिमम्हेला ह्रोमिदा साक्षी थान्सि छेन्दे संस्कार लाजि । थेला छेन्दे संस्काररि थेला ङेङ्गोरला छ्याम पार्टी पंक्तिला राप्किन्बा तासेला लोङ्बासे मजुमदारला छेन्दे मेफ्रा आदोतेदोना क्योङ थुमदा प्रहरीसे कब्जारि किन्बा मुबा ।

मजुमदार सेबालिच्छा नक्सलवादी ङ्योलोकरि गोल्छेसे विभाजन ताबारि चुजि । नक्सलवादी ङ्योलोकरि खाबा थिबाबोबासे भारतीय क्रान्तिकारी कम्युनिष्ट ङ्योलोक तिगाइ कमजोर थेन मत्थर म्राङ्साइ नोन क्योङ ङ्योलोक नक्सलवादी आन्दोलनग्याम नोन प्रभावित थेन उत्साहित ताचिजि । थेतासि चारु मजुमदारदा नक्सलवारी ङ्योलाकला आपा नोन बिमुला । भारतरि दातेनोन सरकारसे नक्सलाईट मिन पिन्बा थेनोन माओवादीजुगुसे क्रान्तिला उद्घोष लाचिबा मुला ओम प्रतिकृयावादीजुगुला ग्याल्सा सत्तादा गतिलो चुनौति पिन्चिबा मुला । प्रतिकृयावादी सरकार बिबारि बाध्ये ताबा मुला, ‘भारतला न्हाङ्ला ह्रावारि मोक्कोनबिमा लोङ्खेप्पा चुनौति माओवादीग्याम नोन मुला ।’ चुङ्यान्दि कमरेड मजुमदारला विचार छोन्बोन मुला ओम झान नोन बाङ्सि, कोङ्सि सर्वहारावर्गला ग्याल्सा सत्ता स्हेङ्बाला लागि शसस्त्र ङ्योलाक जारी थान्चिबा मुला । थे सार्क ह्युलला भारत, नेपाल, बंगलादेश, श्रीलंकाला छ्याम ल्होलो ह्युलरि चलतिचिबा मुक्ति ङ्योलोकला नायक दरप ताचिबा मुला । नक्सालवारी ङ्योलोकला फिलिंगो दारे व्हारव्हारबा भुप्रोरि ग्युर्सिकेन निबा मुला । चारु मजुमदारला हतियारबद्ध ङ्योलोकग्याम नेपाली कम्युनिष्ट पार्टीजुगुसे मोक्कोनबिमा ङामग्याम लोपम्याङ्बा मौका याङ्बा मुबा । तासाइ नोन थेफिरि नतमस्तक चिबा मुला तासाइ संशोधनवाद लिब्रोला लडाईरि आउदिन फितलो सावित तासिकेन निबा मुला । चारु मजुमदारफिरि भावपूर्ण हार्दिक म्होइबा व्यक्त लासेला हिन्ना बिसाम मोक्कोन तोसोला संशोधनवाद, अराजकतावाद, भ्रष्टाचार थेन कम्युनिष्ट रिमठिमरि खाचिबा विर्सजनला लिब्रोरि गंभीर तासि ल्हागतितोबा मोक्कोन क्रान्तिकारी कम्युनिष्टजुगुला कर्तव्य हिन्ना ।

(१२ गोने २०७२ ।

(छिगकि दोनः सानाम्पा– किसान, गेनाम्पा– मजदुर, दुल्बा– दमित, ङ्हाप्बा– शोषित, लिब्रो– बिरुद्ध, केवा– जीवन, केबा– जन्म, न्हुप– पश्चिम, वाङ्खिबा– आबद्ध, स्ह्रुग– रुप, ह्राङ्बाङ्पा– स्वतन्त्रता, ङ्योलोक– आन्दोलन, खेडोब– अध्ययन, ग्याल्साङ– राष्ट्रिय, जोङ– जिल्ला, दाछोक– कमिटी, ह्रोमि– सदस्य, ङ्यान्दि– कारण, ग्यालठिपा– राजनीतिक, ब्रेल्साङ– बिवाह, प्राङ्ग्याल– गरिबी, छोक्बा– समुह, क्योन्बा– उपचार, नाबा– बिरामी, छोङ्नापा– व्यवसायी, छेन्दे– शव, राप्किन्बा– उपस्थिति, ह्रावा– सुरक्षा, ग्युर्बा– परिणत, म्होइबा– श्रद्धान्जली, तोसो– प्रकार)

दोःबा : यकिना अगाध