पुइखाउले जा !
ओन्मा म्हेमेसे
बामरि जुवा खाला
बिबा थेमुवा
दान्दे खाबा ह्राङ छोर्जि ।
चु ल्हुइरि
जुवासे नाङ्बा बाम
डासे नाङ्बा चिवा
तो यु, तारि युसे पिन्बा
याफ्लाला छ्युल्दुर
दोइसे पिन्बा गोला छ्युल्दुर
म्हेर्बा दुइरि तासाइ
छोर्बा दुइरि तासाइ
दुङालरि तासाइ
ताङ्मा तासाइ
दान्दे दोनामि
ह्रो पिन्बान मुला ।
तासाइ नोन !
खेप्पा दुइला टोक्मा
पुइखाउले जा !
तारल्हाम्मा थोबोला क्रा
च्युकुरुक्बा डि
ड्याम्मा डुङ्बा न्हाबेङ
खासु छ्याबा मि
म्रिप्जिन्बा स्वा
ताम कोल्बा ल्हे
ख्लोप क्याबा ग्राम्बा
ल्हेकदार्बा काम
गेसि खाबा खोक्तो
पटपट थिबा गुदुङ
खार्बन निबा टाङ
ख्लासि निबा बाङ
दुइसे पिन्दोबा पिन्जि ।
तासाइ नोन !
खेप्पा दुइला टोक्मा
पुइखाउले जा !
तिन्हाङ्गार बिनाबिना
ङाला एला बिना बिना
दुइ प्युलुलु ह्यार्जि
दिमसे बिला–
निसाम तासेला ।
गाङ्से बिला–
खासाम तासेला ।
बैरिसे बिला–
सिसाम तासेला ।
सेमसे बिला–
सोसाम तासेला ।
तासाइ नोन !
खेप्पा दुइला टोक्मा
पुइखाउले जा !
मन्थली ,१० चनखु, रामेछाप ।
तपाईको प्रतिक्रिया दिनुहोस