एसे बिला
‘ग्युइसेर असफल ताजि ।’
एसे खाइमाइ ङ्योइजि–
लोप्खेन तिल्दा ब्लाप्जि
ग्याल्सासे भाषण लाला,
समाजसे फैसला पाङ्ला,
तासाइ कालोपाटी ग्याप्सेला टु
खाजिबा प्रतिवेदनसे दाप्ला ?
पाठ्यपुस्तक गाइमा खाजि
पाले लोप्खेनला !
भवन ब्रेजि
पाले लोप्खेनला !
लाइनु फोइदान खाजि
निसाल नोन लोप्खेनलान !
तलब दुइरि आखानि,
तासाइ जिम्मेवारी
सातान दुइबिमा ङ्हाच्छा दोगाला ।
प्रशिक्षण कागजरिन सीमित,
अपेक्षा बिसाम मुतेबान ।
नाबा लोप्खेन
डा ख्लाबारि आडिक,
तिल्दाबिसाम लोप्खेन
म्हि आहिन
प्रणालीला मेसिन म्हान्बा मुला ।
जाजामेला केबा रे
क्यालेन्डररि जेक्खे सोला,
टीकाला थुर्बा
फोटो न्हाङरिन म्हाला ।
समाज बिला
‘लोप्खेनसे त्याग लातोला ।’
तासाइ
त्यागला नुप्बा
खाइमा ताला ?
खाइमा लाइनु डाक्टर दोला,
इन्जिनियर दोला,
ब्लोन दोला
गौरव भाषणरि होङ्ला ।
तासाइ जस आम्राङ्बा
गिक्छा हिगि,
धैर्य,
मौन मिहेनत
खाजिबा भाषणसे डान्ना ?
ङा लोप्खेन हिन्ना ।
एसे ङ्योइबारि सेजि
तिल्दाबिसाम ङाइ
ङ्योइबारि आयाङ्बा
अनुशासन लोप्जि ।
ह्युल ङ्हाच्छा वाङ्गाइ बिसि
ङा ह्राङ्नोन लिच्छा चिचिजि ।
ङा कमजोर तासि मौन आरे
ङा मौन मुला,
तिल्दाबिसाम ङा लोप्खेन हिन्ना ।
(छिगकि दोनः ग्युइसेर– शिक्षा, लोप्खेन– शिक्षक, ग्याल्सा– राज्य, पाले– दोष, निसाल– उत्तर, नाबा– बिरामी, डा– कक्षा, ब्लोन– मन्त्री, होङ्ला– गुन्जन्छ, हिगि– अक्षर/लिपी)
दोःबा : यकिना अगाध
तपाईको प्रतिक्रिया दिनुहोस