सिंहासनरि राप्बा म्हि
खाइमा मेलोङ बिमा
ह्राङ्ला क्रिपदा चेगाइ लाबारि चुला
थेग्याम्सेन तिला
फासिवादला गिक्छा गोङ्मा
थेसे बिला–
ङा नोन ग्याल्सा हिन्ना
ओम गोल्छेसे
ह्युलठिमला खारेरि
ह्राङ्ला याहिक्पाला स्होन्बो ब्याला
ह्युल्बाला मिन किन्ना,
तासाइ ह्युल्बादा आङ्यान
ग्याल्सावादला दाज्र्यु थिला,
तासाइ न्हाङ्न्हाङरि
सत्ताला ख्रेन्बासे
ह्युलला आत्मा ग्लोङ्चिबा ताला
थेला ख्यारख्युर
ताली ह्राप्बा भीड मुला,
ङ्योइबा नागरिक आरे
तिल्दाबिसाम ङ्योइबा काइजुगु
काकार लासि
ह्युल द्रोही कापाङ्कि लाबा मुला
थे चिसाङ बिमा आदेशरि विश्वास लाला,
संवादबिमा प्रदर्शनरि,
लोकतन्त्रबिमा
याकार कापाङरि
तिल्मा
बेनिटो मुसोलिनी नोन
चुह्राङ्नोन लासि क्रिङ्बा मुबा
ह्युल ! ग्याल्सा
ओम लिच्छारि
ग्याल्सादान कारागार स्होबा मुबा
एडोल्फ हिटलरसे नोन
भीडला उन्माददा
ह्युलभक्ति बिपिन्बा मुबा,
ओम दोङरापसे म्राङ्जि
ताली ह्राप्बा याजुगुलान गुङ्ग्याम
कोल्मेकि ख्राङ्बा मुबा
तिनि दोसि
याखारगि छार लि
खेःबान नोइ थोसि खाबा मुला
थेसे लोकतन्त्रदा
गाइबा प्रक्रिया बिला
ओम ह्राङ्दा
गिक्खे छिम्बा
तासाइ डान्सि थान्गो
ह्युल खाजिबाइ गिक्खे म्हिला तिङरि छ्याबा आता,
ह्युलमि
करोडौं नागरिकला
साझा सारि सोबा ताला
खाजिबा नेतासे
ह्राङ्बिमा ग्रेन ग्याल्सा म्राङ्बारि ख्लाला
थेसे लिच्छारि
ग्याल्सादान
ह्राङ्ला खल्ती न्हाङरि थान्बारि म्हाइला
थेलिच्छा चुला
डोबाला शासन
कुटिसि चिबाला संसद
ओम ताली ह्राप्बारि बाध्य
याखारगि ब्लाप्बाला ह्युल्बा
दोङरापसे रेमरेम बिबा मुला
फासिवाद
तिक्खुरि टुबाक थोसि आखा
ङ्हाच्छा थे
उद्धारकर्ता दोसि खाला ।
(छिगकि दोनः मेलोङ– ऐना, क्रिप– छाया, चेगाइ– माया, ग्याल्सा– राष्ट्र, ह्युलठिम– संविधान, याहिक्पा– हस्ताक्षर, दाज्र्यु– झण्डा, ङ्योइबा– प्रश्न, कापाङ्कि– घोषित, याकार– एकल, कापाङ– घोषणा, कोल्मेकि– मानवता, खेःबान– पुरानै, नोइ– रोग, छिम्बा– समाधान, डोबा– भय)
दोःबा : यकिना अगाध
तपाईको प्रतिक्रिया दिनुहोस