खानिस्योङ माबर गुङ्थेमा
भुरुङ्गे ल्हाला दिथेमा
चाकुस्योङ मुला थेथेमा
सिला ताला थे तोक जेदेमा
आसिना सोदे बु मुदे
पाङ्गे ह्या व्हा ताम चुदे
चुनाब जिन्जि ताम जिन्गाइ
नामसारि बैरि आम्हान्गाइ ।
दिम मुला हापहोप स्योङ ङामरि
बोमो थाखाउ ह्या व्हा ङाला तामरि
बर्खाइ हाजि होइ नाम डुनडुन
ब्लाप्पा बिआम्याङ थे रेम्हुन
आपाला दुखाइ ओत्तेगेन
आमाला दुखाइ ओत्तेगेन
चुनाब डासिका तिगा लासे
फोइथान ताला गे आलादे ।
तासाइ उइमाला बिमाचा
तिगाइ देःबा धन्दचा
गाडीला ग्यालाम सेर्खारि
ब्राबारि हाम्ला याखारगि
या योकदे माबासे
ख्राङ्गारि ग्यालाम हाबासे
ह्रोकादे म्हाइसि छ्योङ्आतो
च्यान तावामदा लोङ्आतो ।
तिबा गेताङ फेल्गेबाला
ग्यालाम जिन्गाइ निकासला
थेदानका डाना लाबासे
कुटिसि चिआम्याङ डाबासे
ह्रो लातोला ह्याङ्सेनोन
काङ आडुइगाइ स्ह्यानसेनोन
गे लाबादा लापुङ्गे
सुखला दुइ हापुङ्गे ।

(छिगकि दोनः दाःन– सजिलो, फेल्गेबा– विकास)