तिनि, 
‘ग्ले खाउ, ह्युल सोना लाउ !’
बिसि बित्थारि एनिकादे क्रिङ्बाकेन मुला । 
तासाइ, 
ङान्छे म्लेबा आरे थे दोङराप 
खाजिबा दुइरि
ङान्ना ग्योइदा ‘ताइ’ स्होजि
ङान्ना मिनदा ‘कमजोर’ बिजि
ङान्ना धर्मदा ‘दिला’ म्हान्जि 
एन्ना लागि हिन्दु राष्ट्र ‘गौरव’ मुसिम
तासाइ ङान्ना समुदायदा थेसे अछुत स्होपिन्बा मुला
थेतासि, 
ङान्दा अनागरिक स्होबा थे गौरव
ङान्ना मुेतबा समुदायदा स्वीकार्य आरे । 
ङान्छे नोन छ्योकु लाला
तासाइ
ला लु थेन ढोंगी लिखन्डि म्हिजुगुला आहिन
ह्राङ्लान सिमेभुमे लाथान थेन प्रकृतिदा ।
ङान्छे नोन डेन थेन फ्या लाला 
तासाइ,
आले सेबा, गँजाडे थेन सिंहशानला आहिन
ह्युलभक्ति राष्ट्रवादी थेन गेनामदा ।
ग्ले दोसि खाजि बिसाम, दोसेला मुला तानाशाही नोन । 
दोसेला मुला थे लोप्खाङजुगु नोन,
खानाङ ङान्दा डोपुङ्मुबा–
‘जनजातिजुगु ग्याप्से ताबा, असभ्य थेन अछुत हिन्ना ।’
ङानि जनजातिजुगु... !
सिर्जनशील, सहनशील मुला तासाइ कमजोर आहिन । 
ङानि बाप्बा मुला, दारे बाप्बा सेम आरे ।
दारे ङान्ना साप्रा, ङान्ना ग्योइ, ङान्ना ङोसेबा
ङान्ना काइरि पाङ्सेला मुला । 
चु ह्युल पृथ्वीनारायणसे जेक्खे स्होबा आहिन
चु ज्योमोलोङ्मा, चु तराइ, चु पाडाम्हेन्दोजुगु
ङान्ना पुर्खाला कासे नोन वाला ताबा हिन्ना । 
ङानि दोसे म्हासेला आरे
ङानि दोसि कुर्सेला आरे । 
ओम, ङानि धर्मला मिनरि दोसि ग्याप्पा दोसेला आरे । 
ङानि ग्लेवादी आहिन
तासाइ ङानि ग्ले स्होबारि खाम्बा ह्युल्बा हिन्ना ।
ङान्ना काइ दुल्बारि म्हाइजि बिसाम 
चु सिंहह्राङ ङ्हार्सेला मुला । 
(छिगला अर्थः बाप्बा– गुम्सेका, ग्याप्पा– दास, दुल्बा– दबाउन, ङ्हार्बा– गर्जिनु)

दोःबा : यकिना अगाध