ङा आखेला कुरि क्लाङ्बा मुला 
आखेला ज्योयो ग्यार्जा गिक बिमा ल्हाना दिङरि डोङ्स्ह्युजि । 
ङान्ना ज्योज्योला आङि तिलाइ रे ङ्हाच्छा ११७ दिङरि डोङ्स्ह्युजि । 
ज्योज्यो नोन ९२ दिङ्ला मुस्ह्युला 
ङान्ना आखेमाम आङि बिमा ला ङि ङ्हाच्छा डोङस्ह्युजि 
माम नोन ल्हानान खुयु दोसि डोङस्ह्युजि । 
दाते नोन आखेला पुस्ताला याखारगि छोन्बोन मुस्ह्युला
ह्रोदा ज्यामा छोर्मुला–
केवा चुह्राङ्बान सम्पन्न, चुह्राङ्बान गौरवशाली तातोला । 
ओम मुतेबा बिमा महत्वपूर्ण ताम–
बेनान सुखला छ्याम डोङ्जि । 
खालाइला ब्योन सन्तान थेन्ना ङोन्छाङ आडोङ्नि । 
थेदुइरि खाइमागि जेक्खे खालाइदा स्हेर तामुबा 
थेह्राङ्बा दुइरि म्रिङ्कोलाकादेसे चुह्राङ बिमुबा–
‘ओन्छान थे म्रिङ्कोला
थेला ब्योन कोला सिजि
थेह्राङ्बा आपाआमाला केवाला तिगा अर्थ ताला ?’
सिबा ङ्हाच्छा खेप्पामा दोतोजि ले !

गोल्छेसे दुइतेन छोन पोबान
गोल्छे गोल्छे यौवन म्हासिकेन
सुङरि च्याम्बार च्युम्बिर तातोला
यारि काडि तोला
खाटरि चिसि फुर्सदरि ताम लातोला
स्वा ताइतोला
खेप्पादुइरि जाकि ‘म्यो’ नोन तोला 
सिबा ङ्हाच्छा खाम्देदोना केवा नाम्याङ्तोला
ओम सिबरि नोन फुर्सदसे याङ्तोला ।

दातेमि म्हिकादे खाइमादाम्मान, खान्दामान
खात्दामान दिङरि सिबारि चुबा मुला
चु खाराङ्बा डोङ्बा हिन्ना ? 
खालाइसे खासिमाम सेपिन्ना
क्लाङ्ना क्लाङ्लाला लाइनु सिला
ब्राना ब्रानान ब्योनकादे सिला
डोङ्बा अचम्मला स्हे दोजिन्जि ।

तिक्खुरि तामसोर खाला–
‘ओइ ! फलानो सिजिम !’
डोङ्बाला दारेम दिङ नोन आरे । 
(छिगला अर्थः स्हेर– पीडा, छोन– रङ, च्याम्बर च्युम्बिर– चाउरी, नाबा– भोग्नु, डोङ्बा– मृत्यु)

दोःबा : यकिना अगाध