एफिरि दया आखा
बोमो प्योला, एकलव्य ।
एसे ङोसेबारि आखाम्नि
खाल्दा गुरु तेन्सि छ्योकु लाजि
थेमि शिष्य म्हासतिबा म्हि हिन्ना, गुरु आहिन ।
गुरुसे एदा तिगाइ पिन्बा आरेमुबा
कादे एसे लोप्जि, ह्राङ्सेन लोप्जि
ओम कादे सेजि, थेनोन थेसे ब्यािन्ज ।
दोसि गुरु दक्षिणा तिल्दा ?
चु ङ्योइबा एला सेमरि रेतोमुबा
तासाइ एसे सुङ आठ्वाङ्नि ।
एसे चुह्रङ्बा नासि कुटिसि चिमा
ङाला तिङरि पुजुह्राङ्नोन लासि ब्लोला, एकलव्य ।
एफिरि करुणा आहिन
बोमो खाला–
थेरि एसे प्रतिरोध लातोमुबा
थेरि एसे पुइमु जुसि कुर्जि ।
थेरि एसे काइ थितोमुबा
थेरि एसे सुङ डुप्जि ।
एसे म्राङ्आखाम्नि–
सत्ताला चाचाला दोइसे नाङ्बा म्हि
भाडाला ताचा ताबारि खाम्ला
गुरु ताबारि आखाम ।
थे भाडाला तादा
गुरु म्हान्सि ख्योल्जि, एकलव्य ।
चु ख्योल्बा एला म्होइबाफिला दोइ दोजि
एफिरि सहानुभुति आख्लुप
एला भावुकतासे ङादा बोमो रेना लाला ।
एला थाबा याजुम्बि
ङाला मि गुङरि फिर्चिला
ङादा ङोचिला ।
ङा आत्मग्लानिसे प्लिङ्ला
थेरि एसे विद्रोहला विगुल ह्राप्तोमुबा
थेरि एसे धुषण वाण थितोमुबा
थेरि एसे अधर्मदा स्युर्तोमुबा
थरि एसे ह्राङ्दान फुल्जि ।
थुम्ना लाजि ह्राङ्ला मुतेबा अस्तित्व
एसे लड्तितोबा मुबा थे शिष्य म्हासतिबातेन–
थेह्राङ तामा नोन एदा सेसेला मुबा
याजुम्बि थासि तिनि खाराङ्लासि सेजि ।
तासाइ थे डोङ्बा चुबिमा ज्याबा तासेला ।
ङाइ एदा खाराङ्लासि फ्यास्हिङ्से, एकलब्य ?
एदा फ्यास्हिङ्बा बिबा
अन्याय थेन अत्याचारला लिब्रो ताबा
मुतेबा लडाइदा अस्वीकार लाबा हिन्ना ।
एदा फ्यास्हिङ्बा बिबा
लुबा, कप्टि थेन बेइमानीला
पक्षरि राप्बा हिन्ना ।
एला फ्यास्हिङ्बा बिबा
मुतेबा आततायीला समर्थनरि
ह्राङ्ला छाप ल्हागाब लाबा हिन्ना ।
(छिगला अर्थः फ्यास्हिङ्बा– दया, ख्योल्बा– भुल, म्होइबा– श्रद्धा)
दोःबा : यकिना अगाध
तपाईको प्रतिक्रिया दिनुहोस