न्हाम्खाइ तिङरि मुबा,
लानि थुबारि प्याङ्पा ङाला नाम्से
ब्लाप ब्लाप दोसि फ्याङ्बान मुबा ।
फ्याङ्ना फ्याङ्नान् मु गुङरि सुप म्हाजि
ङाइ आम्राङ्जि खालाइसे म्राङ्जि व्हा ।
न्हा ओम खालाङरि ङ्हाङ्जि व्हा
ङादा साजाम्बुलिङरि ख्लासि
फ्याङ्बा, ङाला नाम्से
ङाइ ङालान म्हाबा नाम्से
म्हाइबारि खाबा मुला ।
ङा चु डाजाङरि
लानिला टाक गुसि
दिनिला होइस्हेर डुइसि
लाग्र्युङला छोन ङान्सि
ह्रिग्या लोन्पोला ह्रिरि छोन फोर्बान मुबा ।
डाहु दोङ्ला जोरि न्हेबा ठुङकर्पोला ब्याप
ङान्सि फ्याङ्बा लाबा ङाला नाम्से
डुगछेन ह्राङ दिर्पा ह्रिला च्यान ह्राङ
ङ्हार्बा ङादेन छ्याम्नोन छार्बा ङाला नाम्से
चु जिग्तेनरि केमा छ्याम्नोन केजि ।
छ्याम्नोन चाजि थुङ्जि ग्रेन ताजि
छ्याम्नोन क्राजि ब्राजि
छ्याम्नोन नेजि
खालाइसे ङादा बाङ्साम
स्हु खाबा तिङ न्हे खाइरो
गोर्लाङ ग्लोबा मुबा
थेला तिङ्दे ङाला तिङ गिक्खे मुबा
तिनिम टाङ्सि बोर्जि मु गुङरि सुप म्हाजि
सुङ्गोम दावाङ ङाला नाम्से एसे म्राङ्जि ।
तिमाल, काभ्रे
तपाईको प्रतिक्रिया दिनुहोस