सिन्धुली २५ बेल्बो । बागमती प्रदेश सरकारला ल्हुइथाङलोन्पो किरण थापाला ग्रेनडोन्बोरि सिन्धुली जोङ्दा क्योङ्खोप सुनिश्चितता ओसेम दिगोपना घोषणा लाबा मुला । जोङ खोप समन्वय समिति सिन्धुलीसे गेताङ स्हेङ्सि जोङ्दा क्योङ्खोप सुनिश्चितता ओसेम दिगोपनाला घोषणा लाबा हिन्ना ।

गेताङ ह्युल्हुइथाङ गेदिम, सिन्धुलीला प्रमुख बिमल पटेलला प्रस्ताव, निमित्त प्रमुख जोङ अधिकारी अनुज भण्डारीला समर्थन ओसेम बागमती प्रदेश सरकारला ल्हुइथाङलोन्पो किरण थापाला रोहबररि ताबा मुबा । जोङ खोप समन्वय समितिला चोहो ओसेम जोङ समन्वय समितिला प्रमुख कार्साङ लामाला चोहोदानरि ताबा गेताङरि स्यान्दो सरोकारवालाकादेसे बोकिन्बा मुबा । गेताङरि जोङ्ला गोरकु स्थानीय तहला प्रमुख ओसेम प्रतिनिधिकादेसे ग्रानरि हस्ताक्षर लाबा मुला ।

गेताङदा सम्बोधन लासिकेन ल्हुइथाङलोन्पो किरण थापासे बागमती प्रदेश सरकारसे पाठेघरला सुङ्ला क्यान्सर ताबा म्रिङ्कोलाकादेदा ५० हजार काप्सि बुम गि न्होर क्योन्बारि पिन्बा निर्णय लाबा पाङ्जि । थेसे यान्पाङ्पाजुगुला ल्हुइथाङ बिमा, आधारभुत अस्पताल थेन प्रादेशिक अस्पतालरि थुइबा, बागमती प्रदेशला १३ वटा जोङ, १३ वटा प्रादेशिक अस्पताल गुङ्ला गोर ङ्ही प्रादेशिक अस्पतालरि ‘टेलि मेडिसिन हब’ स्होबा, डिजिटल हेल्थ, दुर्गम थुमरि ल्हुइथाङ शिविर संचालन, योग ध्यान थेन प्रणायमदा विशेष प्राथमिकतारि थान्सि बजेट विनियोजन लाबा पाङ्जि । थेसे मुतेबा लारि चिबा जोङ समन्वय समितिला चिसाङरि पालिकाला ल्हुइथाङ प्रमुखदा पुइगाबारि म्होइजेन लाजि ।

गेताङरि क्योङ्खोप सुनिश्चितता अभियानरि ह्रोलाबा सरकारी निकायकादे, गेदुङ गेन्दुनकादे थेन उत्कृष्ट गेलाबा ल्हुइथाङ्पाजुगुदा डेन लाबा मुबा ।

गेताङरि जोङ अस्पतालला थान गि कम्प्युटर पिन्बा मुबा ।

जोङ्ला १४ तोङ्जा, ग्यार्जा गि, ६८ म्हे बिजाबुमोकादेदा क्योङ्खोप ल्हागाब लाबा गेताङरि जानकारी पिन्जि । १५८ म्हे बिजाबुमोदा सर्वेक्षणरि स्याप्सि खोप ल्हागाब लाजिन्माहेन्से बेनान जोङदा क्योङखो िसुनिश्चितता ओसेम दिगोपना जोङ घोषणा लाबा हिन्ना ।

(छिगला अर्थः ल्हुइथाङ– स्वास्थ्य, ह्युल्हुइथाङ– जनस्वास्थ्य, ग्रान– प्रतिबद्धता, बुम– एक लाख, क्योन्बा– उपचार, यान्पाङ्पा– संचारकर्मी, गेदुङ– संघ, गेन्दुन– संस्था, ल्हुइथाङ्पा– स्वास्थ्यकर्मी, म्हे– जना, बिजाबुमो– बालबालिका)