याम्बु २८ बेल्बो । कीर्तिपुरला ठुम्रार ग्योइकाइ बखेरीला १०६ छा लुङरि कलाकार मित्थु थारुदा विशेष डेन लाबा मुला ।
कैलालीला जानकी गाउँपालिका, भगतपुरला थारु कलाकार मित्थु थारुसे चु दिङ रिमठिम, पर्यटन ओसोम नागरिक उड्डयन मन्त्रालयग्याम सुदुरपश्चिम थुमला साग्युइल थुमरि थुमि पुरस्कार याङ्बा हिन्ना । थेसे चु ङ्हाच्छा नेपाल ललितकला प्रज्ञा प्रतिष्ठानग्याम सुताइ ल्होलो पुरस्कारकादे याङ्जिन्बा मुला । दाङला चखौरातेन ल्होलो ग्लारि थेला मुर्तिकला थेन आङ्सि म्राङ्खाम्ला ।
गेताङरि ठुम्रार ग्योइकाइ बखेरीला संयोजक डा. कृष्णराज सर्वहारीसे थारु ग्योइकाइ जेक्खे आताना थारु साग्युइल थेन सारिमठिम सोना लाबारि ल्हागतिबा स्रष्टाकादेदा नोन बखेरीसे डेन लासिकेन खाबा पाङ्जि । डेन ताबा कलाकार मित्थु थारुसे याङ्बा डेनसे ह्राङ्दा उर्जा काप्बा थेन प्रेरणा पिन्बा पाङ्बान खाबा रेरि छोङ्नाबा तोसोसे कलाकारितादा संयुक्त लिरि ङ्हाच्छा बोर्सेला ग्रान पिन्जि ।
शत्रुघन चौधरीसे संचालन लाबा गेताङरि ग्योइकाइब्रिखेन गणेश वशिष्ठ, सन्तोषी चौधरी, राकेश सिंह, नन्दुराज चौधरी, गणेश वर्तमान, सिताराम चौधरी, विवश चौधरी, कमल संघर्ष, दुर्गा बुढाथोकीतेन ल्होलो ब्रिखेनकादेसे ह्राङ्ह्राङ्ला रचना डोबा मुबा ।
(छिगाला अर्थः लुङ– श्रृखंला, साग्युइल– लोककला, थुमि– क्षेत्री, छोङनाबा– व्यवसायिक, तोसो– ढंग)
तपाईको प्रतिक्रिया दिनुहोस