याम्बु । नेपालला ङ्हाबा वाणिज्य बैंकजुगु गुङ्ला याखारगि राष्ट्रिय बाणिज्य बैंक लिमिटेड (RBBL) ला संचालक समितिला छारचोहोरि देवकुमार ढकाल नियुक्त ताबा मुला ।  गोने २ गते सुङरे चिबा संचालक समितिला चिसाङ्से क्योङ्डिक्सि ढकालदा चोहोरि दाम्माहेन्से थेसे पदभार लाबा हिन्ना ।

ढकालतेन नेपाल राष्ट्र बैंकरि ३० दिङबिमा ल्हाना दुइ ल्होलो जिम्मेवारीरि चिसि सेवा लाबा अनुभव मुला । लिच्छाला दुइ राष्ट्र बैंकला गेकाठाक्पाला जिम्मेवारीरि चिसि गे लाबा ढकाल वित्तीय प्रणाली, बैंकिङ प्रशासन ओसेम नियमन प्रणाली नुरला खेन्पो हिन्ना ।

छारचोहो ढकालदा बैंक संचालक समिति ह्रोमिजुगु महेश भट्टराई, लक्ष्मण घिमिरे, प्रा.डा. रामप्रसाद ज्ञवाली, रोमिला ढकाल उप्रेती, डा. सूर्यबहादुर राना, ग्रोन्पो कार्यकारी अधिकृत देवेन्द्र रमण खनाल, बैंकला डिछ्याबा समितिला पदाधिकारीजुगु, कम्पनी गाउराइ प्रमोद अधिकारी ओसेम ग्रेन्पो कार्यकारी अधिकृतला गेदिमला मुतेबा कर्मचारीजुगुसे डेन लाबा मुबा ।

२०२२ दिङरि स्हेङ्बा राष्ट्रिय वाणिज्य बैंसे दाते ३ ग्यार्जा ९ वटा शाखा गेदिमकादेग्याम ७७ वटा जोङरि छ्योआछ्यो ४७ बुम बिमा ल्हाना सेवाग्राहीदा सेवा पिन्सिकेन खाबा मुला । बैंक ह्राङ्ला सेवादा दुइ आन्सार स्होसिकेन प्रविधिरि आधारित वित्तीय समावेशीकरण थेन टुबा बैंकङ सेवा फेल्गेबारि केन्द्रि ताबा मुला ।

(छिगला अर्थः ङ्हाबा– अग्रणी, सुङरे– शुक्रबार, क्योङ्डिक्सि– सर्वसम्म्त, गेकाठाक्पा– कार्यकारी निर्देशक, नुर– विषय, खेन्पो– ज्ञाता÷विशेषज्ञ, ह्रोमि– सदस्य, ग्रेन्पो– प्रमुख, डिछ्याबा– व्यवस्थापन, बुम– लाख, फेल्गेबा– विकास)