याम्बु ४ गोने । रामेछापला सुनापति गाउँपालिकारि पर्यटनला सम्भावनाफिरि अन्तरक्रिया गेताङ लाबा मुला । दिनिरे याम्बुला भृकुटीमण्डपला पर्यटन बोर्डला हलरि गाउँपालिकासे अन्तरक्रिया थान्बा हिन्ना ।

प्रतिनिधिसभा ह्रोमि ओसेम ङ्हाच्छाला लोन्पो कान्छाराम तामाङसे सुनापतिरि पर्यटनला ल्हानान सम्भावना मुबा पाङ्जि । सुनापतिदा खाँडादेवी गाउँपालिका थेन दोरम्बा सैलुङ गाउँपालिकादोना कालोपत्रे सडकग्याम थुइबारि खाम्साम पर्यटनला सम्भावना तासेला थेला सेमताम मुबा । थेसे पाङ्जि, ‘सुनापति ग्याम गाल्पादोनाला सडक कालोपत्रे स्होबारि खाम्साम पर्यटनला सम्भावना झन ल्हेला ।’

नेकपा माओवादीला ङ्हाच्छाला सांसद् श्यामकुमार श्रेष्ठसे रामेछापदा युद्ध पर्यटकला लिरि नोन चर्चा लाबा ताम थान्बान सुनापतिला पर्यटनरि युद्ध पर्यटनदा नोन केन्द्रित लातोबा पाङ्जि ।

श्रेष्ठसे सुनापति, खाँडादेवी थेन दोरम्बा सैलुङ गाउँपालिकादा थुइसि न्हाङ्ला पर्यटकदा फेल्गेबा लातोबा पाङ्जि ।

नेकपा एकीकृत समाजवादीला केन्द्रीय ह्रोमि ओसेम ङ्हाच्छाला सांसद् देवशंकर पौडेलसे नोन सुनापति थेन दोरम्बा गाउँपालिकासे ह्रोगे लासि पर्यटन ल्हेछ्याला गेताङ ङ्हाच्छा बोर्तोबा पाङ्जि । पौडेलसे पाङ्जि, ‘सुनापतिला देसार नाम्सारि म्हुइखानी ट्वाइबा सुरुङकादे मुला, थेफिरि अध्ययन लातोला ।’

सुनापतिरि मुबा सुवेदार जम्दार धारो थेन अग्लेश्वरी गाङ ह्राङ्बा ऐतिहासिक तामदा प्रचार लाबारि खाम्साम पर्यटनला फेल्गेबा लाबारि खाम्सेला पौडेलसे पाङ्जि ।

गेताङरि नेपाल ललितकला प्रज्ञा प्रतिष्ठानला कुलपति, बागमती प्रदेशसभा ह्रोमि युवराज चौलागाईं, नेकपा एमालेला केन्द्रीय ह्रोम्हि ओसेम रामेछाप इन्चार्ज कमलप्रसाद चौलागाईंतेन स्यान्दोकादेसे पर्यटनला सम्भावनाफिरि चर्चा लाबा मुबा ।

सुनापति गाउँपालिकाला चोहो ठुलोकान्छा तामाङसे सुनापतिरि न्हाङ्ला थेन माङ्ग्यारला पर्यटनला फेल्गेबा लाबारि थेरि होटल थेन रिसोर्टकादे नोन ठ्वाङ्तोबा पाङ्जि । थेसे पाङ्जि, ‘सुनापति समृद्ध स्होबारि मोक्कोनला ह्रो तातोला ।’

(छिगला अर्थः दिनिरे– आईतबार, ह्रोमि– सदस्य, सेमताम– मन्तव्य, फेल्गेबा– विकास, ल्हेछ्या– प्रबर्धन)