याम्बु २७ गोने । नेपाल आदिवासी जनजाति स्योमि गेन्दुनछेन (फेनिज) संघीय दाछोकसे ह्राङ्ला २६ छा स्हेङ्बा दिङसाङला दुइसाङरि मिरे १२ म्हे स्योमिदा डेन थेन पुरस्कार पिन्सेला ताबा मुला । यान्पाङ ओसेम ग्रा प्रविधिब्लोन पृथ्वीसुब्बा गुरुङला डोन्बोग्रेन्पोरि तासेला गेताङला तयारी लाजिन्बा मुला ।
फोनिज गाउराइखाङ चिसाङसे निर्णय लाबाआन्सार फोनिज डेन २०८२ ग्याम ङ्हाच्छाला चोहो गजुरधन राई (नेपाल टेलिभिजन), ङ्हाच्छाला चोहो अमरध्वज लामा (रेडियो शार्दूल) थेन राजवंशी ग्योइला लासोमला स्योस्यो ‘कोचिला सामाद’ (झापा)दा डेन लाबाकेन मुला ।
फोनिज पुरस्कार २०८२ ग्याम स्योमि सविन प्रियसन (दाङ), मुनेस लायो मगर (पर्सा) थेन वन्दना दनुवार (उदयपुर) पुरस्कृत तासेला मुला ।
गेताङरि स्योमि मच्छे गुरुङदा फोनिज फिरग्यापह्युल अवार्ड २०८२ पिन्सेला मुला । फोनिज हेराङ शाखाला ङ्हाच्छाला ह्रोमि थे दाते अमेरिकारि चिसिखाबा मुला । अमेरिकारि चिसिनोन नेपाली ग्योइ थेन स्योनामला ल्हेछ्यारि थेसे भुमिका क्लाङ्सिकेन खाबा मुला ।
फोनिज मलेसिया पुरस्कारग्याम गोरङ्ही स्योमि डेनतासेला मुला । फोनिज मलेसियाला गेचोहो घनश्याम चौधरीला आन्सार पुरस्कृत तासेला स्योमि ज्ञानेन्द्र थोर तामाङ (मकवानपुर) थेन सपना थामी (दोलखा)ला मुला ।
थेनिकादे क्योङदा स्हेङ्बा दिङसाङला दुइसाङरि मिरे डेनलासेला फोनिज संघीय दाछोकसे ग्रादाङ पिन्बा मुला ।
ज्ञानेन्द्र तामाङ मकवानपुरग्याम तेःबा राक्सिराङ साप्ताहिक तेसिकेन खाबा मुला । चुह्राङ्नोन लासि स्योमि थामी गोरखापत्र अनलाईन, याम्बुरि गेलाचिबा मुला ।
फोनिज युके पुरस्कारग्याम नोन गोरङ्ही स्योमि डेन तासेला मुला । फोनिज बागमती प्रदेशसे स्हेङ्बा पुरस्कारग्याम याखारगि स्योमि पुरस्कृत तासेला मुला ।
(छिगदोनः स्योमि– पत्रकार, डेन– सम्मान, गेन्दुनछेन– महासंघ, दाछोक– समिति, यान्पाङ– संचार, गाउराइखाङ– सचिवालय, स्योनाम– पत्रकारिता, ल्हेछ्या– संबर्धन, ग्रादाङ– जानकारी)
तपाईको प्रतिक्रिया दिनुहोस