नुवाकोट । नुवाकोट जोङ्ला दुप्चेश्वर गाउँपालिका–४ ला दोङरापकि ग्लान समुदायला ङार दिमरि ग्लान ग्युबाला गिक्छा ग्याल्साङ जोम्बा ग्रेन स्ह्रुगरि स्योल्बा मुला । अर्जुनबहादुर ग्लानला चोहोदानरि आयोजित चु गेताङरि ल्होलो थुमला विशिष्ट व्यक्तित्वजुगुसे उल्लेखनीय बोकिन्बा मुबा ।

गेताङला ग्रेनडोन्बो ङ्हाच्छाला ब्लोन हितबहादुर तामाङसे तामाङ समुदायला याङ्ताम, ङोसेबा थेन सशक्तिकरणका लागि चुह्राङ्बा छोबाजुगु आउदिन महत्वपूर्ण ताबा धारणा थान्जि । थेसे ह्राङ ब्लोन दोमा छ्योआछ्यो ९० बुम रुपैयाँ बजेट विनियोजन लासि चुबा ग्लान ङार दिम तिनि ह्युलनाङला ग्लान समुदायदा ह्राङ्लान पुख्र्यौली ह्युलरि गोङ्मा जुबा दुइसाङ डुप्मा गर्व व्यक्त लाजि । खाबा रेरि चु ग्युबादा बृहत्तर स्ह्रुगरि ङ्हाच्छा बोर्बान विधान ओसेम कार्यविधि स्हासेला स्पष्ट लाजि ।

ब्लोन तामाङले नुवाकोट जोङ्ला तामाङ समुदाय न्हाङरि नोन ग्लान ग्युबाला संख्या उल्लेख्य मुबा दाबी लाबान ङार दिमरि तिरेम अनिवार्य स्ह्रुगरि दोबा वातावरण स्होतोबारि बाङ पिनिज । छ्यामरि ह्राङ्ला रिमठिम ख्युरछ्यारि ह्राङ्ग्याम खाजिबाइ कमजोरी आतासेला प्रतिबद्धता व्यक्त लाजि ।

स्यान डोन्बो तादी गाउँपालिका चोहो सन्तमान तामाङसे मोक्कोन तामाङ समुदायदा ह्राङ्ला बाप्सा म्हाइबारि म्होइजेन लाबान कुटुम्बग्याम याङ्बा मोलमसे केवारि सफलता बासेला विश्वास व्यक्त लाजि । थेसे गेताङरि सफलताला ज्याबाम्हान्बा नोन पिन्जि ।

हरिवन नगर पालिका स्यानग्रेन्पो डोन्बो हरिमाया ग्लानसे ह्राङ्ला अग्रजजुगुग्याम ‘ग्लान बप्स गोल्फु हिन्ना’ बिसिमाम मिन जेक्खे थेसि खाबा डान्बान तिनि चु चाङ्बा बाप्सारि दोगाम्याङ्मा आउदिन ताङ्बा खाबा सेमताम थान्जि । थेसे ग्लान समुदायला मोक्कोन चेलीबेटीसे चु ग्लारि अनिवार्य स्ह्रुगरि दोगातोबा धारणा थान्जि ।

गेताङरि दुप्तेश्वर गाउँपालिकाला ङ्हाच्छाला चोहो योविन्द्र सिहं तामाङसे २०७४ दिङ्ला जनमतला कदर लाबान ह्राङ्ला ग्यातदुइरि ल्हुइथाङ, ग्युइसेर, सडक ह्राङ्बा भौतिक ङ्हाउदान फेल्गेबाला छ्याम ग्युबाला ङार दिम भवन स्हेङ्बा दुइसाङ याङ्बा उल्लेख लाजि ।

गेताङ स्योल्ना लाबान चोहो अर्जुनबहादुर ग्लानसे ह्युलनाङला ग्लान समुदायला ह्रोमिजुगुदा  ङार दिम, गोल्फु नाम्सा पुरान गेताङरि बोकिन्सि दोङरापकि क्षणदा सफल स्होबासे थुजेछे फुल्जि । थेसे ग्लान समाजला फोला, रिमठिम, रिमठिमकि ओसेम ग्याल्साङ–स्यानह्युल स्तररि ङोसेबा स्थापित लाबा प्रतिबद्धता व्यक्त लाजि ।

गेताङरि वंशावली ब्रेल्चिबा विधानला गोर ब्लि बुँदे प्रस्तावफिरि काठुइ लाबान जोम्बादा ग्रेन स्ह्रुगरि स्योल्ना लाबा मुबा । 

(छिगकि दोनः ग्युबा– वंश, ग्याल्साङ– राष्ट्रिय, स्योल्बा– सम्पन्न/समापन, रिमठिमकि– सांस्कृतिक, स्ह्रुग– रुप, फेल्गेबा– विकास, जोम्बा– सभा, छोबा– भेला, दोङरापकि– ऐतिहासिक, ङोसेबा– पहिचान, बुम– लाख, स्यानग्रेन्पो– उपप्रमुख, चाङ्बा– पवित्र, ल्हुइथाङ– स्वास्थ्य, ग्युइसेर– शिक्षा, ह्रोमि– सदस्य, स्यानह्युल– अन्तर्राष्ट्रिय, ब्रेल्चिबा– सम्बन्धी)