हेराङ । याम्बु महानगरपालिका गोदावरी नगरपालिकाला ङ्योइसाङरि ताचिबा उपत्यकानाङ पालिका न्हाङ्ला खुला गोदावरी मेयर कप फुटबल फाइनलरि दोबा मुला ।

गोदावरी १० टाहाखेलरि स्होबाकेन लाबा गोदावरी बहुउद्देश्यीय रंगशालाला झ्यालुन्टार चेरि मिरे ताबा गिक्छा सेमिफाइनलला क्लाङरि कीर्तिपुर नगरपालिकादा ३–० से ब्रेना लासि याम्बुसे ङ्हीछा रेम उपाधी डाबारि दुइसाङ स्होबा मुला ।

गिक्छा संस्करणरि चन्द्रागिरीदा ब्रेना लासि याम्बुसे उपाधी डाबा मुबा ।

खाबा ड्वाफ्रे २ गते तासेला फाइनलरि याम्बुसे गोदावरी नगरपालिका थेन दक्षिणकाली नगरपालिका गुङ्ला डाबातेन प्रतिस्पर्धा लासेला मुला । याम्बुला लागि क्लाङ्ला म्यान अफ दि म्याच मनिष सेढाईसे २ गोल थेन राज पौडेलसे १ गोल लाजि । गिक्छा हाफला लिच्छारिक्यार मिनेट सोम सम्हालतिबारि आखाम्मा कीर्तिपुरसे रेमदाङ्से २ गोल चाजि ।

याम्बुला लागि क्लाङ्ला ४५ छा मिनेटरि सेढाईसे ङ्हाच्छाला गोल लाजि बिसाम छ्यामरि इन्जुरी दुइरि पौडेलसे गोल काप्बान अग्रता दोब्बर ताना लाजि ।

याम्बुला लागि स्यान्दो गि गोल सेढाईसे ७९ छा मिनेटरि लाजि ।

याम्बु समुह बि ला डाबाला लिरि सेमिफाइनलरि दोबा हिन्ना बिसाम कीर्तिपुर समुह डि ला डाबाला लिरि सेमिफाइनलरि वाङ्बा हिन्ना ।

याम्बुला समुह चरणरि चाँगुनारायणदा ५–१ गोलसे ओम मध्यपुर ठिमी नगरपालिकादा १–० से ब्रेना लाबा मुबा । कीर्तिपुरसे समुह चरणरि तारकेश्वरतेन २–२ गोलला च्योच्यो ओम कोन्ज्योसोम गाउँपालिका लिब्रो ३–० ला डाबा तेबा मुबा ।

ङ्योइसाङ लाबा गोदावरी थेन दक्षिणकाली भिडप तासेला

गोदावरी मेयर कप फुटबलला स्यान्दो सेमिफाइनलरि ङ्योइसाङ गोदावरी नगरपालिकासे दक्षिणकाली नगरपालिकातेन नाबिङरे प्रतिस्पर्धा लाबाकेन मुला ।

समुह ए रि महालक्ष्मी नगरपालिकादा ६–१ से ओम बागमती गाउँपालिकादा ७–० से ब्रेना लाबा गोदावरीसे समुह चरणरि ललितपुर महानगरपालिकातेन १–१ गोलला च्योच्यो क्लाङ्बा मुबा ।

समुह सी रि मुबा दक्षिणकालीसे कागेश्वरी मनोहरा नगरपालिकादा ५–० से ओम चन्द्रागिरी नगरपालिकादा २–१ से ब्रेना लासि सेमिफाइनलरि दोबा हिन्ना ।

गोदावरी मेयर कप याम्बु उपत्यकारि मुबा २१ पालिका गुङरि याम्बु जोङग्याम ६, हेराङग्याम ५ थेन खोपोङग्याम २ पालिकासे बोकिन्बा मुला ।

याम्बु जोङ्ला याम्बु महानगरपालिकाला छ्याम कीर्तिपुर नगरपालिका, चन्द्रागिरी नगरपालिका, दक्षिणकाली नगरपालिका, कागेश्वरी मनहरा नगरपालिका थेन तरकेश्वर नगरपालिकासे क्लाङ्बा मुला । चुह्राङ्नोन लासि हेराङ जोङला ङ्योइसाङ गोदावरीला छ्याम ललितपुर महानगरपालिका, महालक्ष्मी नगरपालिका, बागमती गाउँपालिका थेन कोन्ज्योसोम गाउँपालिकासे बोकिन्बा मुला ।

चुह्राङ्नोन लासि खोपोङ जोङग्याम चाँगुनारायण नगरपालिका थेन मध्यपुर ठिमी नगरपालिकासे बोकिन्बा मुला ।

ङ्हाच्छाला रेम बोकिन्बा याम्बुला नागार्जुन नगरपालिका, टोखा नगरपालिका थेन बुढानिलकण्ठ नगरपालिकासे चुरेम बोआकिन्नि बिसाम चाँगुनारायण थेन कागेश्वरी मनोहरासे गिक्छा रेम बोकिन्बा मुला ।

ङ्हाच्छाला रेम नोन बोआकिन्बा शंखरापुर नगरपालिका, गोकर्णेश्वर नगरपालिका थेन महांकाल गाउँपालिकासे चुरेमरि नोन बोआकिन्नि । चुह्राङ्नोन खोपोङला खोपोङ नगरपालिका थेन सुर्यविनायक नगरपालिकासे नोन बोआकिन्नि ।

प्रतियोगिताला डाबादा ५ लाख थेन स्यानडाबादा ३ लाख न्होरला छ्याम ट्रफि पुरस्कार पिन्सेला मुला । अनुशासित टिमदा ५० हजार ओम उत्कृष्ट गोलकिपर, डिफेन्डर, फर्वाड, सर्वाधिक गोलम्हि थेन उत्कृष्ट प्रशिक्षकदा म्हेदाङ्से २५ हजार न्होर पिन्सेला मुला ।

नगरपालिकाला मेयर गजेन्द्र महर्जनसे उपत्यकारि छार क्लाङ्म्हि केना लाबा थेन फेटबलला विकास लाबा उद्देश्यसे उपत्यकानाङ नगरपालिकान्हाङ फुटबलला ङ्योइसाङ लाबा पाङ्जि ।

मेयर महर्जनसे ह्रि दिमग्याम ३ दशमलब ५ हेक्टर ह्रिला सा रंगशालाला भोगाधिकारला लायि याङ्बा ग्रा नोन पिन्जि ।

थेसे बिजि, ‘नगरपालिकाला गौरवला योजनारि मुबा १५ हजार क्षमताला मिनी रंगशालाला लागि २ अरब खर्च ल्हागतिसेला मुला । चुदा प्रदेश थेन संघला ल्हानादिङ योजनारि थान्सि गे ङ्हाच्छा बोर्सेला मुला ।’

(छिगला अर्थः हेराङ– ललितपुर, मिरे– मंगलबार, दुइसाङ– अवसर, नाबिङरे– बुधबार, खोपोङ– भक्तपुर, स्यानडाबा– उपविजेता, म्हेदाङ्से– जनही, ल्हानादिङ– बहुवर्षे)