हेराङ । दक्षिणकाली नगरपालिकादा ब्रेना लासि गोदावरी नगरपालिका क्लाङ्चिबा उपत्यकानाङ पालिकान्हाङला खुला गोदावरी मेयर कप फुटबल फाइनलरि दोबा मुला ।

गोदावरी टाहाखेलला स्होबाकेन लाबा गोदावरी बहेउद्देश्यीय रंगशालाला झ्यालुन्टार चेरि नाबिङरे ताबा ङ्हीछा सेमिफाइनलला क्लाङरि दक्षिणकालीदा पेनाल्टी सुट आउटरि ४–३ गोल फेबासे ब्रेना लाबान गोदावरीसे याम्बु महानगरपालिकातेन क्लाङ पक्का लाबा हिन्ना ।

निर्धारित ९० मिनेटदोना ङ्हीनोन तर्फग्याम २–२ गोलला च्योच्यो तामाहेन्से क्लाङ्ला निर्णय पेनाल्टीग्याम लाबा हिन्ना ।

ङ्हाच्छाला अग्रता दक्षिणकालीला अमित तामाङसे क्लाङ्बा १५ छा मिनेटरि लाजि । क्लाङ्ला ४९ छा मिनेटरि पासाङ तामाङसे गोदावरीला लागि च्योच्यो गोल लाजि । दोसि क्लाङ्ला ८३ छा मिनेटरि दक्षिणकालीला लागि नवीन कर्माचार्यसे गोल लाबान अग्रता दोब्बर ताना लाजि । क्लाङ्ला लिच्छाला दुइरि अनिल बोम्जनसे गोल लाबान च्योच्यो गोल लाजि ।

तिनिला क्लाङ डाबा गोदावरीला टिमला क्लाङ्म्हितेन मुतेबा ह्रोम्हिदा मेयर गजेन्द्र महर्जनसे डेन लासि १०–१० हजार न्होर पिन्बा घोषणा लाबा मुला ।

चुङ्हाच्छा कीर्तिपुर नगरपालिकादा ३–० से ब्रेना लासि याम्बुसे ङ्हीछा रेम उपाधि डाबा दुइसाङ स्होबा मुला ।

गिक्छा संस्करणरि चन्द्रागिरीदा ब्रेना लासि याम्बुसे उपाधी डाबा मुबा ।

खाबा ड्वाफ्रे २ गते तासेला फाइनलरि याम्बुसे गोदावरी नगरपालिकातेन प्रतिस्पर्धा लासेला मुला ।