मोबाइल ठ्वाङ्बातेन सुकुम्बासीला स्हिक्बा जेक्खे स्याप्ला । गोर ङ्हीसे आत्महत्या लाजिन्जि । जाजा थे बिजा, खेप्पाला लिला स्हेर थेन मिख्लि हृदयबिदारक मुला । बिले, थेनि नेपालला ग्रेन अपराधीजुगु हिन्ना । थेन्से ह्युल मेफ्रा दोना लाबाकेन मुला । नेपालला ग्रेनग्रेन म्हिजुगु सेबा बाङ लाबा मुबा । चुह्राङ्बा अपराधीदा प्रहरी सैनिकला टुबाक ताकतिसि तुरुन्तान कारबाही लातोसेला मुला ।

ग्याल्साला आतंककारी हिन्ना । थेदा तिगाइ घण्टा थेन रेरि स्युर्बा गे आलानि बिसाम ध्वस्त तासेला मुला । चुह्राङ्बान मनोदशारि बालेन्द्र सरकार मुला । थेसे खाजिबाइ सही तथ्यांक थेन डिछ्याबा आलाना सुकुम्बासी चिबाग्ला डोजरसे ध्वस्त स्होबाकेन मुला ।

म्हिला घमण्ड, लहड थेन सनक क्योङ्बिमा खतरनाक ह्रिक्पा हिन्ना । ह्याङ खाजिबाइ प्रबृत्तिसे ग्रसित ताबारि खाम्ला । चुरि बालेन्द्र चुनोन सेमनोइ सिकिस्त म्राङ्मुला । थे याम्बुला मेयर     मुमा हेन्सेला सुकुम्बासीफिला बोमो, आक्रोश थेन घृणा न्हामुबा ।सुकुम्बासी जेक्खे आहिन, ठेलागाडा, फुटपाथ थेन कवाडी मुक्त शहर बिमुबा । थेनिफिरि रेमरेम आतंक काप्बा मुबा । थेला बर्गीय दृष्टिकोणरि शहररि प्राङ्बासे सोबा थेन क्रुबा ख्योल्बा मुला । थेला परिणाम तोङ्जा म्हि क्राबा स्हिक्बा लाचिबा मुला । थेरि ङ्हाच्छाला ग्ले, थे भ्रष्टाचारी नेता बिबासे सुताइ मानवताला लिब्रो चोत्ते निर्मम आतानि । आतासाइ रास्वपा सरकारसे बरबरताला पराकाष्ठा उन्जि ।

बालेन्द्र साहतेन म्हार, न्होर दिम सा ल्हानान ज्याबा मुबा म्राङ्जि । प्राङ्ग्यालला अनुभुती जागि नोन लातोबा आरे ताला । थेसे बासला लागि क्रातोबा, अपमान नातोबा आरे । चुमि करोडौं क्योङ ह्युल्बातेन अनुभव मुला । दिमला दिमम्हे ह्रोमिरि क्रुबा– ओतला ङ्यान्दि क्राबा क्रिङ्बा लामा जिम्मेवार म्हिला स्हेर छिगरि व्यक्त लाबारि आखाम । तिल्मा राणा शासन, पन्चायत लिब्रो थेन जनयुद्ध जनआन्दोलन मोक्कोन नेपालीला ताङ्बा, सुखला लागि ताबा हिन्ना । थे क्रान्तिरि हजारौंला बलिदान ताजि । तिनि सुकुम्बासीदा खाराङ्लासि दुल्बा मुला, थे सहिदला आत्मला नाङ्बा हिन्ना । मोक्कोन बिद्रोहलिच्छा दाते जेन्जी बिद्रोह ताजि, चुसे नोन ह्युल्बाला कुरवानी लाबा हिन्ना ।

दाते वास्तवरि हताररि खाजिबा ज्योरि सुकुम्बासी ब्याङ्बा गे ताबा मुला, चु प्राङ्बो फिला घृणा नोन हिन्ना । ग्याल्साला सर्बोच्च ग्लारि मुबा म्हिदा चुह्राङ्बा याङ्ताम आता ।

ग्याल्साला अभिभावकसे ह्युल्बाला कोङ्ह्रावा थेन फेल्गेबा लाबा हिन्ना । म्हिदा क्राना लासि आनान्दित ताबा छुट काइब्लोनदा ताबारि आखाम । ङा जनयुद्धला घाइते थेन ह्युलठिम स्होबा याखारगि ह्रोमिला क्वाइसे सुकुम्बासी डिछ्याबारि गम्भीर ताबारि ह्रिला । छ्यामरि, क्रान्तिकारी मोक्कोन ह्युल्बासे ख्योल्बा गोङ्माला लिब्रो लाबारि अपिल लाला ।

(छिगकि दोनः स्हिक्बा– चीत्कार, ग्याल्सा– राज्य, डिछ्याबा– व्यवस्थापन, ह्रिक्पा– स्वभाव, सेमनोइ–मनोराग, क्रुबा– आस्रय, ख्योल्बा– गलत, प्राङ्ग्याल–गरीबी, ह्रोमि– सदस्इ, ङ्यान्दि– कारण, ज्यो– शैली, याङ्ताम– अधिकार, कोङ्ह्रावा– सुरक्षा, फेल्गेबा– विकास, काइब्लोन– प्रधानमन्त्री, क्वाइ– नाता, ख्योल्बा– गलत)

दोःबा : यकिना अगाध