चालिस डिग्रीला छेप्पासे क्रोबाला भाबरला ग्यालाम
तिनि जेक्खे बुडुइ थेन टुसे आहिन
मानवताला क्रिङ्बासेनो लेप्बा मुला ।
दिनिसे मु क्लेबान मुला
तासाइ, थेबिमा नुप्पा क्लेबा मुला म्हिला सेमन्हाङरि ।
सिस्टमला कठोर यासे नाङ्बाला केवा,
असहाय, प्राङ्बो
काङ ङ्ही जुबा सेम्चेन ह्राङ्बान
स्होबा थे आत्माजुगु
ह्राङ्लान ज्युङ्बाला प्रमाण
म्हाइसिकेन कोर्चिबा मुला
च्यामा मि क्रोबा होजु दृष्य ।
याखारगि ज्योजो,
तिङन्हाङरि तोङ्जा चोट थोसि
सारि क्याबा ह्राङ्लान आङाला
नाइबा ज्युबाला ल्हुइ पुइसि
बाबाकेन मुला ।
तिगदा ?
जेक्खे जाकि तिगाइ न्होरला लागि ।
बैंकला कठोर म्रापसे
केवा बिमा ङ्हाज्याङ प्रमाण ह्रिजि
आम्माई ! कात्ते निर्दयी ङ्योइबाजुगु ।
तिगा छेन्दे ल्हुइनोन दारेम छोन्बो मुबाला प्रमाण हिन्ना ?
तिगा मिख्लिला साइ आरे चुरि ?
ग्यालाम क्राचिबा मुला,
लावासे सुस्केरा ब्याङ्चिबा मुला
ओम मानवता
तिनि साउप्बा मुला,
थेनोन सडकला ङामरि गुर्चिबा मुला
चु जेक्खे याखारगि
आहिन,
चु ह्याङ्ला दुइला मेलुङ हिन्ला–
थेरि संवेदनशीलता सिबा मुला
ओम कागजला प्रमाणसे
म्हिला केवादा डाबा मुला ।
(छिगकि दोनः बुडुइ– धुलो, सेम्चेन– जनावर, ज्युङ्बा– अस्तित्व, छेन्दे– लास, साउप्बा– निस्सासिएको, मेलुङ– ऐना)
तपाईको प्रतिक्रिया दिनुहोस