ओइ
बालेन्द्र शाह,
देन्बालान
जेबा मुबा नेपाल
थे दुइ
ह्युलरि ए ह्राङ्बा नेताजुगुतेन
निजी साधन ह्राङ्लासि
डोजर आरेमुबा ।
खानाङ खानाङए दाते नोन
जेबा मुला नेपाल
थेरि ए ह्राङ्बा
नेतासे चलप लाबा
बिनासकारी डोजर
दोबा आरे ।
याम्बु सहरहेन्से
ल्हानान थारेङ छोर्बा
दुर्गम बिमा दुर्गम डान्बा
वाफ्युर म्राङ्बा थे पाडाला गाङजुगु
तोर ज्योमोगाङरिक्यार हिरा ह्राङ टल्कप ताबा
ग्लिङ्ला नोबा बुथुम थेन ल्हागाङजुगु
हिन्ना, दाते नोन जाम्बुलिङलान
जेबा बिमा जेबा
कुमारी ह्युलजुगु मुला
थे थोप्साङसे लामा दातेदोना
ए ह्राङ्बा नेतासे
चलप लाबा डोजरग्याम
बलजफ्ती बलात्कार ताबाग्याम
सोबा मुला ।
सहरहेन्से क्यारला
विकट नाम्सा बस्ती ङाम
खाइमाइ लोप्खाङ आनिबा
तासाइ युङ्बाला हिक्पा ब्रिबारि सेबा
ङान्ना पुर्खाजुगुसे ब्रिसिथान्बा
आब्रिबा दोङरापजुगुला दस्तावेज
कात्ते माने थेन म्हान्दाङजुगु
दाते नोन राप्चिबा मुला
थेरि दातेदोना
ए ह्राङ्बा नेतासे चलप लाबा
अहंकारला डोजर
दोबा आरे ।
सहर हेन्से कोशौ थारेङ
सुदुरला अप्ठ्यारा ग्यामजुगुरि
दोइ पुइसि सेम न्हाबारि
ङान्ना आख्खेजुगुसे स्होबा
न्हानजुगु दाते नोन लेङ्बा मुला
थेरि दातेदोना
निरंकुश सत्तासे हाँकतिबा
बालेन डोजर दोबा आरे ।
डोजरसे छार नेपालला
नक्सा कोरतिसि
बालेन्द्र एसेमि
ह्युलला प्राङ्बो म्हिजुगुदा
ल्हुन्दिसे नाका गाप्माह्राङ गाप्जि
ङ्हाच्छा ग्रा आपिन्ना
सुकुम्बासीदा
‘बस्ती ख्लागो’ बिबा
एला हुकुम जारी ताना तानान
चु दुइरि क्योलोलोला छारिब्योन
रविन तामाङजुगुसे
जाम्बुलिङ नोन ख्लासि निजि
रविन तामाङजुगुला
डोङ्बाला जिम्मेवार
एनोन हिन्ना बालेन्द्र !
ओइ डोजरे इन्जिनियर,
ओइ डोजरे ब्लोन,
ओइ डोजरे जनतामारा
तानाशाही,
ह्रेच्छाक ध्यानस्थ तासि
आत्मालोचना लासि
एला तान्बादा कुरि ख्वाइसि
ह्रेच्छाक सोचतिसि च्यागो
ए न्हाङरि नोन खानाङए मानवता बिबा
जिनिस मुला बिसाम
रविन तामाङजुगुला
आमा आपा दोसिमाम
थे दुला ग्योइरि
ह्रेच्छाक ब्लुम्सि च्यागो
खाराङ्बा ताला
तान्बा गुमाप लाबाला स्हेर ?
ओइ बालेन्द्र,
तिगाइ दुइ
सत्ता थेन शक्तिला प्योबारि
ल्हानान घमण्ड आलासाइ ताला
ए साजाम्बुलिङरि खाबा
मृत्युञ्जय तासिमाम
केबामि पक्कान आहिन ताला
थेतासि ह्रेच्छाक ए
एला अहंकारला मे ग्योइरि
छोन्बोन क्रोसि मेफ्रा दोला ले !
ओम,
ए चिबा सहर ख्यारख्युरला
ए ह्राङ्बान म्हिला
सुकुम्बासी ब्राङ्जुगु
चोदे जेबा ह्युलला
आजेबा तस्बिर बिला बिसाम
प्राङ्ग्याल निवारण थेन ह्युल फेल्गेबाला मिनरि
ह्युल आरेबा ह्युल्बादा स्युर्सिमाम
एला सन्की डोजरसे
बिजाबुमोला तिसाला छ्याम
ब्राङ्जुगु बोचिमा
नोइपा खेप्पा आपा आमाजुगु
थेन, लाइनुजुगु ग्वाँग्वाँ क्राचिबा
थे कारुणिक दृश्यजुगु
तिगा सुकुम्बासी बस्ती बिमा
तोङ्जाछा गुणा आजेबा तस्बिर आहिन ओम ?
(छिगकि दोनः बुथुम– थुम्का, ल्हागाङ– पहाड, ह्युल– भूमि/देश, थोप्साङ– भाग्य, हिक्पा– अक्षर, ग्रा– सूचना, छारिब्योन– युवा, ब्लोन– मन्त्री, तान्बा– सन्तान, दु– शोक, स्हेर– पीडा, प्राङ्ग्याल– गरिबी, फेल्गेबा– विकास, बिजाबुमो– बालबालिका, नोइपा– रोगी)
दोःबा : यकिना अगाध
तपाईको प्रतिक्रिया दिनुहोस