थे सामान्य लोप्खाङरि लोप्बोनला गे लामुबा । म्रिङ्चासे पाङ्जि, ‘ओइ खेप्पा, एला सुख्खा तलबसे दिम चलप आतानि । तिगाइ स्यान्दोन गे म्हाइगो ।’
ह्रेम्बोचासे थोबो रिसिकेन पाङ्जि, ‘डोबारि लोप्बा गेसे स्यान्दो गे सोचतिबा फुर्सद नोन आरे । आ, ङामि स्हुआखाबा क्रा स्हुखाना आला । एनोन स्हुखाना लाउ ।’
म्रिङ्चासे ताङ्सिमाम हुरछ्योङ्सि पाङ्जि, ‘आइडिया... ङाला ङोसेबा याखारगि नाना क्योलोलो ब्लोन दोस्ह्युबा मुला । ह्रोदा पाङ्सिमाम खाजिबाइ ग्लारि छुगनिबा नियुक्ति पिन्पुङ्ला ल्हा खेप्पा !’
ह्रेम्बोचा ह्रेच्छाक छेम निना ङेजि ओम पाङ्जि, ‘ताममि चुह्राङ्बा लाजि, बिले एनोन खाजिबाइ चल्तपूर्जा गेदिमला हाकिम हिन्ना । सेमला लड्डु म्हारतेन चाबारि ख्लागो । सुइसुइ ह्राङ्ला गे लाउ ।’
म्रिङ्चा ह्राङ्ला गेरि वाङ्जि । ब्लोनदा ताङ्ना लाजि । बिबा ह्राङ्नोन थेला ह्रेम्बोला नियुक्ति याखारगि आयोगला आयुक्तरिगा ताजि । च्याना च्यानान सामान्य लोप्बोन माननीय सम्बोधन लाबा ग्लारि दोजि ।
ह्रेम्बोचा आयुक्त दोसिमाम सरकारी गाडीरि क्रेसिमाम याम्बुला एसीवाल कोठारि चिसिमाम कार्यान्वयन आताबा फायलरि हस्ताक्षर लाबारि चुजि । क्यार्से म्रिङ्चा ग्यागारदानला दिम ज्याना लासिमाम च्याबारि चुजि ।
हाङ्बाला ला मुबा । माननीय आयुक्तसे दिमला म्रिङ्दा स्ह्योरिन फोन लाजि, ‘तिगा मुला डार्लिङ, ग्यागारदानरि हाङ्बा कातिकु मुला ?’
म्रिङ्चासे हाङ्बासे आछ्युछ्यु लासिकेन पाङ्जि, ‘हुस्सुसे दिनिन आफे । चुर्से हाङ्बाला ताम नोन थालाउ । झन् ह्राङ्नोन मुआस्ह्युमा हेन्सेम... । ल्हाउ ख्लास्हिगो चुर्सेला ताम । याम्बुरिक्यारमि झन् ल्हाना हाङ्बा मुसिम !’
आयुक्त ह्रेम्बोरछेसे न्होङ्बा रेडियोह्राङ ङेसिकेन बिजि, ‘खाइ, ङादाम चुरि हाङ्बाला तिगाइ अनुभूति नोन ताबा आरे बिबा ।’
क्यार्से, ग्रेन काइरि ताचिबा ताम ङ्यान्चिबा दिमला गे लाबा ग्याप्पा बोडोक्बाकेन मुबा, ‘एसीवाल गाडीरि छ्योङ्बा मुला, एसीवाल कोठारि चिबा मुला । हाङ्बाला अनुभूति खाराङ्लासि तागाइ ओम क्यानाक्योरदा । ङानिह्राङ स्ह्यो स्ह्योरिन ताङ स्याल्बा, क्वान ख्रुबा लातोबा हिन्सागा ।’
(छिगकि दोनः लोप्बोन– शिक्षक, ब्लोन– मन्त्री, छुगनिबा–गज्जबको, छेम निना–मज्जाले, ग्यागारदान– तराई)
दोःबा : यकिना अगाध
तपाईको प्रतिक्रिया दिनुहोस