चुनावी माहोलसे नाम्सा क्योङ्नोन लेप्बा मुबा ।
चोकरि भाषण, दिम दिमरि ग्रान थेन गल्ली–गल्लीरि दाज्र्युला छोन फोबा क्लाङ चलप ताचिबा मुबा ।
मनिला स्ह्योरि क्युइ ताबारि थोन्मा ग्यामरि पोस्टर फ्लाक्चिबा केटाजुगु म्राङ्जि । थेनिकादे तिल्मादोना स्यान्दो पार्टीला नारा ल्हागाब लाबाकेन मुबा, तिनि छार दाज्र्यु थोसि थेनोन जोशरि क्रिङ्चिबा मुबा ।
‘नाना, चुपाल्छे ग्युरपोबा पक्का !’ गिक्खेसे ज्युमङेसिकेन पाङ्जि ।
मनिलासे नोन जाकि ज्युमङेजि, तासाइ सेमन्हाङरि ङ्योइबाजुगु च्यार्चिबा मुबा– ‘खाजिबा ग्युरपोबा ? खाल्ला लागि ?’
दिमरि दोगामा थेला आपा खेःबा रेडियोला ङामरि चिचिबा मुबा । थेसे ल्हानान चुनाव म्राङ्बा मुबा– दाज्र्यु पोबा, लि पोबा तासाइ ख्राङ्गाला प्राकथिबा सा थेन अधूरो म्हाङ बिसाम खाइमाइ आपोबा ।
‘जामे ।’ आपासे नुप्बा काइरि पाङ्जि, ‘चुपाल्छे खाल्दा मत पिन्बा सेम लाबाकेन मुला ?’
मनिला तिगाइ दुइ कुटिसि चिजि ।
माङ्ग्यारग्याम लाउड स्पिकरला काइ खाचिबा मुबा–
‘ङानि फेल्गेबा बाला, समृद्धि बाला... ।’
थेसे आपादा प्लिक च्याजि, ‘आपा फेल्गेबामि मुतेबा चुनावरि खाला, तासाइ ह्याङ्ला दिम दोना तिल्दा आदोगा ?’
आपासे थोबो कुर्जि । ‘तिल्दाबिसाम, जामे... ह्याङ्मि मत पिन्ना, तासाइ ङ्योइबारि म्लेला ।’
चुनावला ङ्हाच्छाला रे मनिलाला दिमरि याखारगि नेता खाजि । सुङ्फिरि मुस्कान, काइरि केकेबा ओम
जाजाबा झोलारि तिगाइ ‘उपहार’ ।
‘ङान्दा डाना लास्ह्युगो ।’ थेसे पाङ्जि, ‘ह्राङ्ला काक्ता ङान्ना काक्ता हिन्ना ।’
मनिलासे झोलारिक्यार च्याजि– थेरि म्ल्हा, छ्युगु थेन तिगाइ नोटजुगु मुबा ।
ह्रेच्छाक थेला सेम क्यारमार ताजि– दिमला नाछाल कमजोर मुबा, चु स्हेसे तिगाइ रेदा देःबा स्होपिन्छेला मुबा । तासाइ, थेला आपाला ताम डान्जि–
‘मत पिन्बा जेक्खे आहिन, ङ्योइबा ङ्योइबा नोन जिम्मेवारी हिन्ना ।’
थेसे गोल्छेसे झोला फ्लिकदोसि पिन्जि ।
‘सर ! ङाला मत आग्युर । ङाला मतमि ङ्योइबातेन खिबा मुला ।’
नेता तिगाइ दुइ मौन चिजि, थेलिच्छा औपचारिक मुस्कान पिन्सिमाम फ्लिकदोसि निजि ।
चुनावला रे खाजि । मनिला मतदान केन्द्ररि लाइनरि राप्जि– थेला या थानथान मुबा, तासाइ सेम न्हाङरि याखारगि दृढ़ता मुबा ।
थेसे मत पिन्मा म्हान्जि– ‘चु जेक्खे याखारगि चिन्हरि ल्हागाब लाबा छाप आहिन, चु ह्राङ्लान ज्युङ्बाला काइ हिन्ना ।’
दिमरि दोमा आपासे ङ्योइजि, ‘मत पिन्जि ?’
मनिलासे थोबो ह्योङ्जि, मिरि जाजाबा चमक मुबा– ‘हिन्ना आपा, चुरेम ङाइ मत जेक्खे आपिन्नि, ह्राङ्ला साइ नोन सोना लाजि ।’
माङ्ग्यार दाते नोन दाज्र्युजुगु ह्योङ्चिबा मुबा । नाराजुगु होङ्चिबा मुबा– तासाइ थे जाजाबा दिम न्हाङरि गिक्छारेम चेतनाला ह्याल लुङ्चिबा मुबा ।
मिरिक, दार्जीलिङ, भारत ।
(छिगकि दोनः ग्रान–वाचा, दाज्र्यु– झण्डा, क्लाङ– खेल, ग्युरपोबा– परिवर्तन, ङ्योइबा– प्रश्न, खेःबा– परानो, फेल्गेबा– विकास, काक्ता– समस्या, नाछाल– अवस्था, देःबा– सजिलो, ज्युङ्बाला– अस्तित्व)
दोःबा : यकिना अगाध
तपाईको प्रतिक्रिया दिनुहोस